މިއަހަރުގެ މިހާތަނަށް މަސްވެރިންނަށް 5.7 މިލިއަން ރުފިޔާ ޖަމާކޮށްފައިވާ ކަމަށް ސަރުކާރުގެ މަސް ކުންފުނި މިފްކޯއިން ހާމަކޮށްފިއެވެ.

މިފްކޯއިން މިއަދު ބުނީ މި އަހަރުގެ މިހާތަނަށް މަސްވެރިންނަށް 5،747،098 މިލިއަން ރުފިޔާ ޖަމާކޮށްފައިވާ ކަމަށެވެ.

އޭގެ ތެރޭގައި ހިމެނެނީ މިއަހަރުގެ ފުރަތަމަ ދުވަހު 74 ދޯނިން ކިރާފައިވާ 311 މެޓްރިކް ޓަނުުގެ މަހަށްވާ 3،667،760 ރުފިޔާ އާއި މި އަހަރުގެ ދެވަނަ ދުވަހު 46 މަސް ދޯނިން ކިރާފައިވާ 173.9 މެޓްރިކް ޓަނުގެ މަހަށްވާ 2،079،338 މިލިއަން ރުފިޔާ އެވެ.

މިފްކޯއިން ބުނީ 2023 ވަނަ އަހަރުގެ ނޮވެމްބަރު މަހުގެ 20 ވަނަ ދުވަހުން މި އަހަރުގެ ދެވަނަ ދުވަހުގެ ނިޔަލަށް މަސްވެރިންނަށް އެއް ބިލިއަނަށް ވުރެ ގިނަ ރުފިޔާ ޖަމާކޮށްފައިވާ ކަމަށެވެ. އެއީ 181 ދޯނިން ކިރާފައިވާ 57،521 ޓަނުގެ މަހަށްވާ ފައިސާއެވެ.

މަސްވެރިންނަށް ދޭންޖެހޭ ފައިސާގެ ބެކްލޮގް މިހާރު ހުސްކުރެވިފައި ވާތީ، ބީއެމްއެލްގައި އެކައުންޓެއް އޮތް ކޮންމެ މަސްއޮޑިއަކަށް 48 ގަޑިއިރު ތެރޭގައި ފައިސާ ދޫކުރަން ސަރުކާރުން މިހާރުވަނީ ފަށާފައެވެ. އަދި އެމްއައިބީގައި އެކައުންޓު ހުރި މަސްވެރިންނަށް 48 ގަޑިއިރު ތެރޭގައި ފައިސާ ހަމަޖެއްސުމުގެ މަސައްކަތް ކުރަމުން އަންނަ ކަމަށް ވެސް ސަރުކާރުން ހާމަކޮށްފައިވެއެވެ.

ރިޔާސީ އިންތިޚާބުގެ ތެރޭގައި ރައީސް މުޢިއްޒު ވަނީ މަސްވެރިން މިފްކޯއަށް ކިރާ މަހަށް އެންމެ ދަށްވެގެން ކިލޯއަކަށް 20 ރުފިޔާ ދެއްވާނެ ކަމަށް ވިދާޅުވެފައެވެ. ނަމަވެސް ސަރުކާރުން ވަނީ މަހުގެ އަގު 16 ރުފިޔާއަށް ތިރިކޮށްފައެވެ.