ވޭސްޓް މެނޭޖުމަންޓް ކޯޕަރޭޝަން، ވެމްކޯއިން އަތޮޅު ތެރޭގައި ހިދުމަތް ދޭ ރަށްރަށުގައި ކުނި ނެގުމުގެ ހިދުމަތުގެ ބިލް ކަރަންޓު ބިލުގެ ތެރޭގައި ހިމަނަން އެ ކުންފުނިން ނިންމި ނިންމުން ބަދަލު ކޮށްފައިވާކަން ހާމަކޮށްފިއެވެ.

އެ ކުންފުނިން ކުރިން ނިންމާފައި އޮތީ، 1 ޖެނުއަރީ 2025 އިން ފެށިގެން ވެމްކޯއިން އަތޮޅު ތެރޭގައި ޚިދުމަތް ފޯރުކޮށްދޭ ގޭބިސީ ތަކުން ކުނި ނަގައިދިނުމުގެ ހިދުމަތުގެ ބިލް، ޔުޓިލިޓީ އެހެން ހިދުމަތެއްގެ ބިލުގައި ހިމެނުމަށެވެ.

ނަމަވެސް، ވެމްކޯއިން މިއަދު ނެރުނު އިއުލާނެއްގައި ބުނީ، އެ ނިންމުން ޑރ. މުހައްމަދު މުއިއްޒުގެ ލަފާފުޅުގެ މަތިން ބާތިލް ކުރެވިފައިވާ ކަމަށެވެ.

ރައީސްގެ ލަފާފުޅާއި އެއްގޮތަށް ނިންމުން ބަދަލު ކުރިނަމަވެސް އެގޮތަށް ބަދަލުކުރަން ރައީސް އެންގެވީ ކީއްވެކަމެއް ވެމްކޯއިން ހާމަކޮށްފައެއް ނުވެއެވެ.

ވެމްކޯއިން އިތުރަށް ބުނެފައިވަނީ، އެ ބަދަލާއެކު ވެމްކޯގެ ހިދުމަތް ފޯރުކޮށްދޭނީ ހަމައެކަނި އެކުންފުނީގެ ހިދުމަތަށް ރަޖިސްޓްރީ ކޮށްފައިވާ ފަރާތްތަކަށް އެކަނި ކަމަށެވެ. އަދި ވެމްކޯގެ ބިލަށް ފައިސާ ދެއްކުމުގެ އިންތިޒާމް އަތޮޅު ތެރޭގައި ގާއިމްކޮށްފައިވާ އޮފީސްތަކާއި ވެމްކޯގެ އަވަސްޕޭ ޕޯޓަލް މެދުވެރިކޮށް ހަމަޖައްސާފައިވާނެ ކަމަށްވެސް ވެމްކޯއިން ކުރި އިއުލާނުގައި ބުނެފައިވެއެވެ.