އިންޑިއާގެ ޖާސޫސީ އިދާރާ، ރޯ ގެ އެހީގައި ރައީސް ޑރ. މުޙައްމަދު މުޢިއްޒު ވެރިކަމުން ދުރުކުރަން އިދިކޮޅުން މަސައްކަތް ކުރިކަމަށް ބުނެ ވޮޝިންޓަން ޕޯސްޓުން ފެތުރި ވާހަކަތަކުގައި ހަގީގަތެއް ނެތްކަމަށް ފޮރިން މިނިސްޓަރު ޢަބްދުﷲ ޚަލީލް ވިދާޅުވެއްޖެއެވެ.

ޚަލީލް މިހެން ވިދާޅުވީ، އިންޑިއާއަށް މިހާރު ކުރައްވަމުން ގެންދަވާ ދަތުރުގެ ތެރެއިން އެ ގައުމުގެ "ވިއޯން" ނިއުސްއަށް ދެއްވި ހާއްސަ އިންޓަވިއުއެއްގައެވެ.

އެ އިންޓަވިއުގައި ޚަލީލް ވިދާޅުވީ، އިންޑިއާ އާއި ރާއްޖެއާ ދެމެދު އޮތީ ވަރަށް ބަދަހި ގުޅުމެއް ކަމަށާ، ނަމަވެސް އެ ގުޅުން ހީނަރުކުރަން ބައެއް ފަރާތްތަކުން ވާހަކަ ދައްކަމުން ދާކަމަށެވެ. އެގޮތުން ވޮޝިންޓަން ޕޯސްޓުން ނެރުނު ރިޕޯޓަކީ ވެސް ދެ ގައުމުގެ ގުޅުމަށް ހީނަރުކަން ގެނައުމަށް ބަޔަކު ކޮށްފައިވާ ކަމެއްގެ ގޮތުގައި އޭނާ ސިފަކުރެއްވިއެވެ.

ޚަލީލް ވިދާޅުވީ އެއީ ކަނޑައެޅިގެން ހަގީގަތާ ހިލާފު ވާހަކަތަކެއް ކަމަށާއި، އެއީ ކޮން ދިމާލަކުން ހޯދި ހެކިތަކެއްގެ މައްޗަށް ބިނާކޮށްފައި އޮތް ވާހަކައެއް ކަމެއް ވެސް އެނގެން ނެތްކަމަށެވެ.

ނޫސްވެރިޔާ ތަކުރާރުކޮށް އެ ސުވާލު ކުރުމުން ވެސް ޚަލީލް ވިދާޅުވީ އެއަށް ދެއްވަން އޮތް ޖަވާބަކީ، އެއީ ހަގީގަތެއް އޮތް ރިޕޯޓެއް ނޫންކަމުގައެވެ.

ޚަލީލް މިހެން ވިދާޅުވިނަމަވެސް، ވޮޝިންޓަން ޕޯސްޓުގެ ރިޕޯޓްގައިވާ ގޮތުން ވެރިކަން ވައްޓާލަން އިންޑިއާގެ ޖާސޫސީ އިދާރާ، ރޯގެ ބައެއް އެޖެންޓުންނާއެކު ރާއްޖޭގެ އިދިކޮޅު ޕާޓީން ބޮޑު ޕްލޭނެއް ތައްޔާރުކުރިއެވެ. އަދި އެ ޕްލޭންގެ ދަށުން މަޖިލީހުގެ 40 މެންބަރުންށާއި ސިފައިންނާއި ފުލުހުންގެ އިސް 10 އޮފިސަރުންނަށް ރިޝްވަތުދީ ރާއްޖޭގައި ހަރަކާތްތެރިވާ ތިން ގޭންގަކަށް ފައިސާ ހުށަހަޅަން ވެސް ނިންމާފައި އޮތް ކަމަށް އެ ރިޕޯޓުގައި އޮތެވެ.

އަދި އެ ޕްލޭންގެ މައުލޫމާތު އެނގިވަޑައިގަތުމުން ރައީސް މުޢިއްޒު ހާއްސަ ފިޔަވަޅުތަކެއް ވެސް އެކަމަށް އެޅުއްވިކަމަށް ރިޕޯޓުގައި ބުނެފައިވެއެވެ.