ޑިމޮކްރެޓްސްގެ ރައީސް ހަސަން ލަތީފް މިއަދު މަގާމުން އިސްތިއުފާ ދެއްވައިފިއެވެ.

އެމްޑީޕީގެ ކުރީގެ ޗެއަރޕަރސަން ޙަސަން ލަތީފް ޑިމޮކްރެޓްސްގެ ރައީސްގެ މަޤާމުން އިސްތިއުފާ ދެއްވާފައިވާއިރު އޭނާ އެމްޑީޕީއަށް އަލުން ގުޅިވަޑައިގަތުމަށް ނިންމަވާފައިވާ ކަމަށް މަޢުލޫމާތު ލިބިފައިވެއެވެ.

ޙަސަން މިފަދަ ނިންމެވުމެއް ނިންމަވާފައިވާއިރު ޑިމޮކްރެޓްސްގެ ނައިބު ރައީސް މުޙައްމަދު ޝިފާޒް އާއި ރިޔާސީ އިންތިހާބުގައި ޑިމޮކްރެޓްސްގެ ރަނިންމޭޓެއްގެ ގޮތުގައި ވާދަކުރެއްވި ހުސެއިން އަމްރާއި ޑިމޮކްރެޓްސްގެ ކުރީގެ ޕީޖީ ލީޑަރ އަލީ އާޒިމް އިއްޔެ ވަނީ އެމްޑީޕީއާ ގުޅިވަޑައިގެންފައެވެ.

ޑިމޮކްރެޓްސްގެ އިސް ބޭފުޅުން އެމްޑީޕީއާ ގުޅިވަޑައިގަންނަވަމުން ގެންދަވާއިރު ކުރިއަށް އޮތް ތަނުގައި ދެޕާޓީން ގުޅިގެން ސަރުކާރު ޖަވާބުދާރީ ކުރުވުމަށް މަސައްކަތް ކުރުމަށް މީގެކުރިން މަޝްވަރާ ކޮށްފައިވެއެވެ.

ޑިމޮކްރެޓްސް އަކީ އެމްޑީޕީގެ ކުރީގެ ރައީސް މުޙައްމަދު ނަޝީދަށް ތާޢީދުކުރާ ފަރާތްތަކުން އުފެއްދި ޕާޓީއެކެވެ. އެޕާޓީގެ ފަރާތުން ހުޅުދޫ ދާއިރާގެ ކުރީގެ މެމްބަރު އިލްޔާސް ލަބީބް ވަނީ މިދިޔަ ރިޔާސީ އިންތިހާބުގައި ވާދަކުރައްވާފައެވެ. 15000 އަށް ވުރެ ގިނަ ވޯޓާއެކު އިލްޔާސް ވަނީ އިންތިހާބުގައި 03 ވަނަ ހޯއްދަވާފައެވެ.

2023 ވަނަ އަހަރުގެ ޖުލައިމަހު 12 ވަނަ ދުވަހު އުފެއްދި ޑިމޮކްރެޓްސްގެ ދަފްތަރުގައި 3280 މެންބަރުން ތިބިކަމަށް އީސީގެ ހިސާބުތަކުން ދައްކައެވެ.