މުދަލު ޒަކާތުގެ ގޮތުގައި މިދިޔަ އަހަރު 100 މިލިއަނަށް ވުރެ ގިނަ ރުފިޔާ ލިބިއްޖެ އެވެ.

މީރާގެ ތަފާސް ހިސާބުތަކުން ދައްކާގޮތުން މިދިޔަ އަހަރު މުދަލު ޒަކާތުގެ ގޮތުގައި 101،939،070.15 ރުފިޔާ ލިބިފައި ވެއެވެ.

އިސްލާމިކް މިނިސްޓްރީން ބުނީ މިއީ އެއް އަހަރުގެ ތެރޭގައި މިހާތަނަށް މުދަލު ޒަކާތުގެ ގޮތުގައި ލިބުނު އެންމެ ބޮޑު އަދަދު ކަމަށެވެ،

ރާއްޖޭގެ ޒަކާތުގެ ނިޒާމު ހަރުދަނާކުރުމުގެ ގޮތުން މި ސަރުކާރުން ވެރިކަމަށް އައުމަށް ފަހު ރައީސް ޑރ. މުހައްމަދު މުއިއްޒު ވަނީ 2023 ވަނަ އަހަރުގެ ޑިސެމްބަރު މަހު "މޯލްޑިވްސް ޒަކާތު ހައުސް" ގެ ނަމުގައި ހާއްސަ އިދާރާއެއް އުފައްދަވައިފަ އެވެ.

އަދި ޒަކާތު ހައުސްއިން މިދިޔަ އަހަރު ވަނީ ޒަކާތާ ގުޅުންހުރި ކަންކަމަށް އަހުލުވެރިކޮށް ހޭލުންތެރިކަން އިތުރުކުރުމަށް ތަފާތު ހަރަކާތްތަކެއް ވެސް ކުރިއަށް ގެންގޮސްފަ އެވެ.

އިސްލާމިކް މިނިސްޓްރީން ބުނީ ޒަކާތު ހައުސްއިން ހިންގި ހަރަކާތްތަކުން މުދަލު ޒަކާތް ދައްކާ މީހުން އިތުރުވެފައިވާކަން މީރާގެ ތަފާސް ހިސާބުތަކުން މިހާރު ހާމަވެގެން ގޮސްފައިވާ ކަމަށެވެ.