ނިމިގެން ދިޔަ ސަރުކާރުން ހުޅުވާލި ގެދޮރުވެރިޔާ ސްކީމްގެ ދަށުން ދޫކުރަން ނިންމި ފްލެޓްތަކަށް އެދި ހުށަހެޅި ހުރިހާ ފޯމުތައް އިވެލުއޭޓްކުުރުމުގެ ބަދަލުގައި ހަަމައެކަނި ފްލެޓް ލިބުނުކަމަށް އިއުލާންކުރި 4000 ފޯމު އިވެލުއޭޓްކުރަން ނިންމައިފި އެވެ.

ގެދޮރުވެރިޔާ ސްކީމަށް ކުރިމަތިލުމަށް ހުޅުވާލުމުން 20،000 ފޯމް ވަނީ ހުށަހަޅައިފަ އެވެ.

އެެހެން ނަމަވެސް އޭސީސީން ކުރި ތަހުގީގުގައި އެ ފޯމުތަކުގައި ބޮޑެތި މައްސަލަތައް ހުރިކަން އޮތީ ފާހަގަވެފަ އެވެ. އޭގެ ތެރޭގައި ޝަރުތު ހަމަނުވާ މީހުންނަށް ފްލެޓް ދިނުމާއި ސައްހަ ނޫން މައުލޫމާތު ފޯމުތަކުގައި ހުރުން ހިމެނެ އެވެ.

މިއަދު ބޭއްވި ނޫސްވެރިންގެ ބައްދަލުވުމުުގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވީ އޭސީސީގެ ތަހުގީގުގައި ފާހަގަކޮށްފައިވާ އެއް ކަމަކީ މާލޭގައި މެދު ނުކެނޑި އުޅުނުކަން ކަނޑައެޅުމުގައި އެއް ހަމަ އެއް ގެންގުޅެފައިނުވާ މައްސަލައެވެ.

އަދި ދެން ލިސްޓުގެ ސައްހަކަން ކަށަވަރުކުރާ އިރު މާލޭގައި މެދުނުކެނޑި އުޅުނުކަމަށް ބަލާނީ މެދު ނުކެނޑި އެއް އަހަރަށް ވުރެ ގިނަ ދުވަހު މާލޭގައި އުޅުމުން ކަމަށް މިނިސްޓަރު ވިދާޅުވި އެވެ.

"ރައީސުލްޖުމްހޫރިއްޔާ ހާމަކުރައްވާފައިވާ ސިޔާސަތުތަކާ އެއްގޮތަށް ދިއުމަށްޓަކައި އަދި އޭސީސީއާއި އެހެނިހެން އިދާރާތަކުން ފާހަގަކުރައްވާފައިވާ ކަންބޮޑުވުންތައް ބަލައި އަޅުގަނޑުމެން މިހާރު ނިންމާފައި ވަނީ ފްލެޓަށް އެދިފައިވާ ހުރިހާ ފަރާތްތައް އަލުން އިވެލުއޭޓް ކުރުމުގެ ބަދަލުގައި 15 ނޮވެންބަރު 2023ގައި ގެޒެޓް ކުރެވިފައިވާ ވެރިފިކޭޝަން ޕްރޮސެސްއެއް ކުރިއަށް ގެންދިއުމަށް. މި ވެރިފިކޭޝަން ޕްރޮސެސް ކުރިއަށް ގެންދާއިރު ބަލާނީ 26 ޖޫން 2022 ގައި ގެޒެޓް ކުރެވުނު ގެދޮރުވެރިޔާގެ ސްކީމްގެ ދަށުން ފްލެޓް ދޫކުރާ އުސޫލަށް." މިނިސްޓަރު ވިދާޅުވި އެވެ.