ދުންފަތުގެ ބާވަތްތައް އުފެއްދުމަށް ބޭނުންކުރާ ތަކެތި ރާއްޖެއަށް އެތެރެ ކުރުމަކީ މަނާކަމެއް ކަމަށް ގާނޫނުގައި ކަނޑައެޅިގެން ބަޔާންކޮށްފައި ނެތުމުން ކަސްޓަމްސުން މީގެކުރިން ހިފެހެއްޓި ރޯލިން ޓޮބޭކޯ ޝިޕްމަންޓްތައް ދޫކޮށްލައިފި އެވެ.

ކަސްޓަމްސުން އެ ޝިޕްމަންޓްތައް ހިފެހެއްޓީ ދުންފަތާ ދެކޮޅަށް ހަރުކަށި ފިޔަވަޅުތަކެއް އަޅައި ރައްޔިތުންގެ މަޖިލީހުން ފާސްކޮށް މިދިޔަ އަހަރުގެ ތެރޭގައި ރައީސުލްޖުމްހޫރިއްޔާ ތަސްދީގުކޮށްފައިވާ ދުންފަތް ކޮންޓްރޯލް ކުރުމުގެ ޤާނޫނުގެ ދަށުން ބައެއް ފިޔަވަޅުތައް އެޅުމަށް ހެލްތު މިނިސްޓްރީން އެންގުމާ ގުޅިގެންނެވެ.

އެގޮތުން ރާއްޖޭގައި ދުންފަތް އުފެއްދުމަކީ މަނާކަމެއް ކަމަށް ޤާނޫނުގައި ބަޔާން ކޮށްފައިވާތީ ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ ތަކެތި އެތެރެކުރާނަމަ ހިފަހައްޓަން ހެލްތު މިނިސްޓްރީން ވަނީ ކަސްޓަމްސް އަށް އަންގާފައެވެ.

އެހެން ނަމަވެސް ރޯލިން ޓޮޮބޭކޯ ރާއްޖެ އެތެރެކުރުމަކީ ގާނޫނާ ހިލާފް ކަމަކަށް ނުވާތީ، ކަސްޓަމްސުން ކުރިން ހިފަހައްޓާފައިވާ ދުންފަތް އުފެއްދުމަށް ބޭނުންކުރާ ތަކެތީގެ ޝިޕްމަންޓުތައް މިހާރު ވަނީ ދޫކޮށްލާފައެވެ.

ކަސްޓަމްސްގެ އޮފިޝަލަކާ ޙަވާލާދީ ރާއްޖޭގެ މީޑިއާތަކުގައި ރިޕޯޓް ކޮށްފައިވަނީ އެ އިދާރާއަކީ ތަންފީޒީ އިދާރާއެއް ކަމަށާއި އެހެންކަމުން ޤާނޫނުގައި އެތެރެކުރުން މަނާކޮށްފައި ނުވާ އެއްޗެއް ހިފެހެއްޓިދާނެ ކަމަށް ނުދެކޭ ކަމަށެވެ.

މިމަހު ކުރީކޮޅު ހެލްތް މިނިސްޓްރީން ކަސްޓަމްސްއަށް އަންގާފައި ވަނީ، ދުންފަތާ ބެހޭ ގާނޫނަށް ގެނެސްފައިވާ އިސްލާޙާއި ގުޅިގެން ދުންފަތް އޮޅަން ބޭނުންކުރާ ސަމާނު ރާއްޖެއަށް އެތެރެކޮށްފިނަމަ އެ ތަކެތި ހިފެހެއްޓުމަށެވެ.

އެހެންކަމުން، މި މަހުގެ ދެވަނަ ދުވަހު ރާއްޖެއަށް އެތެރެކުރި އެފަދަ ޝިޕްމަންޓްތައް ކަސްްޓަމްސުން ހިފެހެއްޓިއެވެ. އޭގެ ތެރޭގައި، ދުންފަތް އޮޅުމަށް ބޭނުންކުރާ ދުންފަތާއި އޭގެ ފިލްޓަރާއި ކަރުދާސް ހިމެނެއެވެ.