ބޮލީވުޑްގެ މަޝްހޫރު ތަރިންކަމަށްވާ ކަންގަނާ އަދި އާރު މަދަވަން އެކުގައި އަނެއްކާވެސް ފިލްމަކުން ފެންނަން އުޅޭ ކަމަށް މީޑިއާތަކުން ރިޕޯޓު ކޮށްފިއެވެ.

ބޮލީވުޑް ހަންގާމާގެ ރިޕޯޓެއްގައި ބުނެފައިވަނީ ކަންގަނާ މިހާރު މި ފިލްމުގެ ޝޫޓިން ފަށާފައިވާކަމަށް އޭނާގެ އިންސްޓަގްރާމުގައި ހިއްސާ ކޮށްފައިވާ ކަމަށެވެ. ކަންގަނާ އިންސްޓަގްރާމުގައި މި ވާހަކަ ހިއްސާ ކުރަމުން ބުނެފައިވަނީ އޭނާ އެންމެ އުފާވަނީ ފިލްމު ސެޓުގައި ހުންނަ އިރު ކަމަށެވެ.

ވިޖޭ ޑައިރެކްޓުކުރާ، އަދި ޓްރިޑެން އާރޓްސްގެ އާރް ރަވިންދުރަން ޕްރޮޑިއުސް ކުރާ މި ފިލްމަށް އަދި ނަމެއް ދެވިފައެއް ނުވެއެވެ. ނަމަވެސް މި ފިލްމަކީ ސައިކޮލޮޖިކަލް ތުރިލާ ފިލްމެއް ކަން ރިޕޯޓުތަކުން އެނގެއެވެ.

ކަންގަނާ އަދި އާރު މަދަވަން ވަނީ މީގެ ކުރިންވެސް އެކުގައި މަސައްކަތް ކޮށްފައެވެ. އެގޮތުން އެމީހުން އެކުގައި މަސައްކަތް ކުރިއިރު އެމީހުންގެ ކެމިސްޓްރީ ރަނގަޅުވުމުން އެ ފިލްމުތަކަށް އެތައް ބައެއްގެ ތަރުހީބު ވަނީ ލިބިފައެވެ.

ކަންގަނާ އެންމެ ފަހުން ފެނިފައިވަނީ މިމަހު ނެރުނު ފިލްމު "އެމަޖެންސީ" އިންނެވެ. މަދަވަން އެންމެ ފަހުން ފެނިފައިވަނީ "ހިސާބް ބަރާބަރު" އިންނެވެ.