ސިޔާސީ ގޮތުން ސަރުކާރާ ދުރަށް ޖެހިވަޑައިގަންނަވާނެ ކަމުގެ އިޝާރާތެއް ފަތުރުވެރިކަމާ ބެހޭ ވަޒީރު ކަމުގެ މަޤާމުން މިއަދު ވަކި ކުރެއްވި އިބްރާހިމް ފައިސަލް މިއަދު ދެއްވައިފިއެވެ.

ފައިސަލްގެ ސިޔާސީ މުސްތަޤްބަލާމެދު ރާއްޖޭގެ އޮންލައިން މީޑިއާއަކުން މިއަދު ކޮށްފައިވާ ސުވާލަކަށް ޖަވާބު ދެމުން ފައިސަލް ވިދާޅުވިކަމަށް އެމީޑިއާގައި ބުނެފައިވަނީ ސިޔާސީ ގޮތުން ދެން ފެންނާނީ ކުރިއަށް ވުރެ ވަރުގަދަކޮށް ކަމަށެވެ.

ހަމައެއާއެކު މިވަގުތު ހުންނެވީ ސަރުކާރާއެކު ނޫން ކަމަށާއި ނަމަވެސް ވަކި ގޮތެއް ނިންމެވުމުގެ ކުރިން ބައްޕައާ މަޝްވަރާ ކުރަށްވާނެ ކަމަށް ފައިސަލް ވިދާޅުވެފައިވާކަމަށް މީޑިއާގައި ވެއެވެ. ފައިސަލްގެ ބައްޕައަކީ ރައްޔިތުންގެ މަޖިލީހުގެ ރައީސް އަބްދުއްރަޙީމް ޢަބްދުالله އެވެ.

“އިރާދަކުރެއްވިއްޔާ ސިޔާސީ މަސައްކަތުގައި މިއަށްވުރެ ގަދަޔަށް ފެންނާނެ. މިހާރު ދެން މިހުރީ ސަރުކާރާ އެކުގައެއް ނޫން ދެއްތޯ.” ފައިސަލް އާ ޙަވާލާދީ މީޑިއާގައިވެއެވެ.

އޭގެ އިތުރުން ފައިސަލް ވިދާޅުވެފައިވަނީ ވަޒީރުކަމުގެ މަޤާމުން ވަކިކުރަށްވައި ރައީސް އޮފީހުން ފޮނުވި ސިޓީގައި ވެސް އެއްވެސް ސަބަބެއް ބުނެދީފައި ނުވާކަމަށެވެ. އަދި ސަރުކާރަށް ޚިދުމަތް ކުރެއްވީ އިޚްލާސްތެރިކަމާއެކު ކަމަށާއި ކޮރަޕްޝަންގެ ޢަމަލެއްވެސް ހިންގަވާފައި ނުވާނެކަމަށް ފައިސަލް ވިދާޅުވެފައިވެއެވެ.

ފައިސަލް މިހެން ވިދާޅުވެފައިވާއިރު ފައިސަލްގެ ބައްޕަ އަބްދުއްރަޙީމް މިއަދު ވިދާޅުވެފައިވަނީ ވަޒީރުކަމުގެ މަޤާމުން ފައިސަލް ވަކިކުރެއްވުމަކީ ވަރަށް ދެރަވަރުކޮށް ރައީސް ކުރެއްވި ކަމެއް ކަމަށެވެ.

ހަމައެއާއެކު ރައީސް އާ ދެމެދު ގުޅުން މުޅިން ރަނގަޅު ނޫންކަމުގެ އިޝާރާތެއް އަބްދުއްރަޙީމްވެސް މިއަދުވަނީ ދެއްވާފައެވެ.