އާއިލާ މީހުންނާއެކު މަސައްކަތް ކުރުމަކީ ރަނގަޅު ކަމެއްް ނޫން ކަަމަށް ބޮލީވުޑްގެ ތަރި ޝާހިދު ކަޕޫރު ބުނެފިއެވެ.

އޭނާ މިހެން ބުނެފައިވަނީ ދާދި ފަހުން ދިން އިންޓަވިއުއެއްގައި އާއިލާއާއެކު މަސައްކަތް ކުރުމުން ދިމާވާ މައްސަލަތަކާ ބެހޭ ގޮތުން ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ ގާތް އާއިލީ މީހުންނާއެކު ކޮލަބޮރޭޓު ކުރުމުން ޖަޒުބާތީ ގޮތުން ދަތިތަކެއް ކުރިމަތިވާ ކަމަށެވެ.

އަދި އާއިލާ މީހުންނާއެކު މަސައްކަތް ކުރުމަކީ އެހާ ރަނގަޅު ކަމެއް ކަމަށް އޭނާއަކަށް ނުފެންނަ ކަމަށްވެސް ޝާހިދު ވަނީ ބުނެފައެވެ. ޝާހިދު އިތުރަށް ބުނެފައިވަނީ އޭނާ އާއިލާ މީހުންނާއެކު މަސައްކަތް ކުރަން ބޭނުން ނުވާ އެންމެ މައިގަނޑު ސަބަބަކީ މަސައްކަތުގެ މައިދާނުގައި ބުނެވޭ އެއްޗެއްގެ ސަބަބުން ނުވަތަ ކުރެވޭ ކަމެއްގެ ސަބަބުން އެމީހުންނާ މައްސަލަ ޖެހިދާނެތީ ކަމަށެވެ.

މީގެ ކުރިން ޝާހިދު ވަނީ އޭނާގެ ބައްޕަ އަދި ބޮލީވުޑްގެ ވެޓެރަން އެކްޓަރު ޕަންކަޖު ކަޕޫރު އާއެކު މަސައްކަތް ކޮށްފައެވެ. އަދި އޭނާގެ ކޮއްކޮ އިޝާން އަކީވެސް އެކްޓަރެކެވެ. ނަމަވެސް އޭނާ މިހާރު މި ދެތަރިންނާއެކު މަސައްކަތް ކުރުމުގެ ހިޔާލެއް ނުގެންގުޅޭ ކަމަށް ރިޕޯޓުގައި ވެއެވެ.

މަސައްކަތުގެ މައިދާނަށް ބަލާއިރު ޝާހިދު މިހާރު މަސައްކަތް ކުރަމުންދަނީ އޭނާގެ ފިލްމު "ދޭވާ" ނެރުމަށެވެ. މި ފިލްމު ނެރުމަށް ހަމަޖެހިފައިވަނީ މިމަހު 31 ގައެވެ.