ފުޓްބޯލް އެސޯސިއޭޝަން އޮފް މޯލްޑިވްސްގެ ފައިސާއަށް ޚިޔާނާތްތެރިވި ކަމަށް ތުުހުމަތު ކުރެވޭ މައްސަލާގައި އެ އެސޯސިއޭޝަންގެ ކުރީގެ ރައީސް ބައްސާމް ޢަދީލް ޖަލީލްގެ މައްޗަށް އުފުލާފައިވާ ދަޢުވާތަކުގެ އަޑުއެހުމެއް ކްރިމިނަލް ކޯޓުގައި މިއަދު ކުރިއަށް ގެންގޮސްފިއެވެ.

ދައުލަތުން ބައްސާމްގެ މައްޗަށް ކޮށްފައިވަނީ ހިޔާނާތުގެ ދައުވާ އާއި މަނީ ލޯންޑްރިންގެ ދައުވާއެވެ. މި ދަޢުވާތައް ކޮށްފައިވަނީ އެފްއޭއެމްއަށް 2018 ވަނަ އަހަރު ފީފާއިން ދިން ފައިސާގެ އިތުރުން 9،999 ޑޮލަރު ބައްސާމްގެ އަމިއްލަ އެކައުންޓަށް ޖަމާކޮށް، ބޭނުންކުރި ކަމަށް ތުހުމަތު ކުރެވޭތީއެވެ.

މި މައްސަލަތަކުގައި ކްރިމިނަލް ކޯޓުގައި މިއަދު ކުރިއަށް ގެންދިޔަ އަޑުއެހުމުގައި ދައުލަތުން ވަނީ ބައްސާމުގެ މައްޗަށް ދައުވާ އިއްވައިފައެވެ.

ދައުލަތުން ދައުވާ އިއްވައި ނިމުމުން، ބައްސާމްގެ ފަރާތުން ވަނީ އޭނާގެ މައްޗަށް ކޮށްފައިވާ މަނީ ލޯންޑަރިންނާއި ހިޔާނާތުގެ ދައުވާއަށް އިންކާރުކޮށްފައެވެ. އެގޮތުން ބައްސާމުގެ ވަކީލު ވިދާޅުވީ ދައުލަތުންކުރާ ދައުވާގައި ބަޔާންކޮށްފައިވާ ކަންކަމަކީ ބައްސާމް ކުރަށްވާފައިވާ ކަންކަން ނޫންކަމަށާއި އެހެންކަމުން އެ ދައުވާތަކަށް އިންކާރުކުރާ ކަމަށެވެ.

އެހެންކަމުން މައްސަލަ ބައްލަވާ ފަނޑިޔާރު މިއަދުގެ އަޑުއެހުން ނިންމަވައިލެއްވީ ދިފާއީ ހެކި ހުށަހެޅުމަށާއި ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމަށް 10 ދުވަހުގެ ފުރުސަތެއް ދިފާއަށް ދެއްވުމަށް ފަހުގައެވެ.

ބައްސާމުގެ މައްޗަށް ކޮށްފައިވާ ދަޢުވާތަކާ ގުޅިގެން ދައުލަތުން ވަނީ ބައްސާމްގެ ޕާސްޕޯޓް ހިފަހައްޓައި އަމީން އެވެނިއު އިން ގަނެފައިވާ ދެ އެޕާޓްމަންޓް ފުލުހުންގެ ބެލުމުގެ ދަށަށް ގެންގޮސްފައެވެ.

ބައްސާމުގެ ފުލެޓުތައް ފުލުހުންގެ ބެލުމުގެ ދަށަށް ގެންގޮސްފައިވަނީ، ފީފާއިން އެފްއޭއެމްއަށް ފީފާއިން ދިން ފައިސާއިން އެ ފުލެޓުތައް ގަނެފައިވާކަމަށް ތުހުމަތު ކުރެވޭތީ އެވެ. އަމީން އެވެނިއު އިން ބައްސާމް ދެ ފުލެޓް ގަނެފައިވަނީ އެފްއޭއެމްގެ 3،084،000ރ. ބޭނުންކޮށްގެން ކަމަށް ފުލުހުން ވަނީ ބުނެފައެވެ.