އަމިއްލަ ޝިޕިންގ ކުންފުންޏެއް އޮތުމަކީ ދިވެހިރާއްޖޭގެ އިޤްތިޞާދީ އިސްތިޤްލާލަށް އެޅުނު ވަރަށް ހަރުދަނާ ބިންގަލެއް ކަމަށް އެސްޓީއޯގެ މެނޭޖިން ޑިރެކްޓަރ ޙުސައިން ޢަމްރު ވިދާޅުވެއްޖެއެވެ.

އަލަށް އުފެއްދި ދިވެހި ދައުލަތުގެ ޝިޕިންގ ކުންފުނި، އެމްއެސްއެސްގެ ޚިދުމަތް ރަސްމީކޮށް ފެށުމަށްޓަކައި މިއަދު މާލޭ ވިޔަފާރި ބަނދަރު ސަރަހައްދުގައި ބޭއްވި ރަސްމިއްޔާތުގައި ވާހަކަ ދައްކަވަމުން ޢަމްރު ވިދާޅުވީ މިއަދަކީ ތާރީޚީ ދުވަހެއްކަމަށާއި، މިއީ ދިވެހިރާއްޖޭގެ އިޤްތިޞާދީ އިސްތިޤްލާލަށް އެޅުނު ވަރަށް ހަރުދަނާ ބިންގަލެއް ކަމަށެވެ. ބަދަލުވަމުންދާ ދުނިޔޭގައި ދިވެހިންވެސް ބަދަލުވަމުން ދާން ޖެހޭކަން ފާހަގަކުރައްވަމުން އަމްރު ވިދާޅުވީ، މީގެ ކުރިން ރާއްޖޭގައި އޮތް ޝިޕިންލައިން ހުއްޓާލަން ޖެހުމުގެ އަސްލަކީ ދުނިޔޭގެ ޝިޕިން އިންޑަސްޓްރީއަށް އައި ބަދަލުތަކާ އެއްވަރަށް ދިވެހިންނަށް ފައިހަމަ ނުކުރެވުން ކަމުގައެވެ.

އަދި ރާއްޖޭގެ ޤައުމީ ޝިޕިންލައިނެއް އަލުން ފެށިގެން ދިއުމަކީ އެތައް ދިވެހިންނަކަށް ވަޒީފާ ލިބުމާއެކު، ރާއްޖެއަށް ފަސޭހައިން މުދާ އެތެރެކުރެވި، ވިޔަފާރިވެރިންނަށް ހެޔޮއަގުގައި މުދާގެނަސް ރައްޔިތުންނަށް ހެޔޮ އަގުގައި މުދާ ލިބިގެން ދިއުމަށް ލިބުނު އުއްމީދެއް ކަމަށް އަމްރު ފާހަގަ ކުރެއްވިއެވެ.

މި ރަސްމިއްޔާތުގައި ވާހަކަ ދައްކަވަމުން އެމްއެސްއެސްގެ މެނޭޖިން ޑައިރެކްޓަރު އަބްދުﷲ ސައީދު ވިދާޅުވީ ރާއްޖޭގެ އަމިއްލަ ޝިޕިންގ ކުންފުންޏެއްގެ މަސައްކަތް ފެށުމާއެކު މުދާ އެތެރެ ކުރުމަށް ބޭރުގެ ބަޔަކަށް ބަރޯސާވާން ނުޖެހޭނެ ކަމަށެވެ. އަދި މިކަމުގެ ސަބަބުން ދިވެހި ރައްޔިތުންގެ އިތުރުން ސަރުކާރާއި ވިޔަފާރިވެރިންނަށް ފައިދާ ކުރާނެ ކަމަށް ސައީދު ވިދާޅުވިއެވެ.

ސައީދު ވިދާޅުވީ އެމްއެސްއެސްގެ ފުރަތަމަ ބޯޓުގެ ފުރަތަމަ ދަތުރުގައި ރާއްޖެއަށް ގެނައީ މިހާރަށް ބޭނުންވާ ކާޑުގެ ބާވަތްތަކާއި ސިއްހީ ފަރުވާއަށް ބޭނުންވާ އާލާތްތައް ކަމަށެވެ. އަދި މިކަމުންވެސް އެނގިގެން ދަނީ ރާއްޖޭގެ އަމިއްލަ ޝިޕިން ކުންފުންޏަކަށް ގައުމު ބޭނުން ވެފައިވާ މިންވަރު ކަމުގައި ސައީދު ވިދާޅުވިއެވެ.

ރާއްޖޭގައި ޝިޕިންގެ ހިދުމަތް ދިހަ ވަރަކަށް އަހަރުގެ މެދުކެނޑުމަކަށް ފަހު އަލުން ފެށި އިރު، މި ކުންފުންޏަކީ ދިވެހިންނަށް އާ އުއްމީދު ތަކެއް ގެނެސްދޭނެ ކުންފުންޏަކަށް ވާނެ ކަމަށް އުއްމީދު ކުރައްވާ ކަމުގައިވެސް ސައީދު ވިދާޅުވިއެވެ. އަދި ދިވެހި ފަޅުވެރިންނާއި ދިވެހި އޮފިސަރުންނަށް ވަޒީފާގެ ފުރުސަތު ލިބި ޒުވާނުންނަށް އާ ސިނާއަތެއްގައި މަސައްކަތް ކުރުމުގެ މަގު ފަހިވެގެންދާނެ ކަމަށް އުއްމީދު ކުރައްވާ ކަމުގައި ވެސް ސަޢީދު ވިދާޅުވިއެވެ.

ސައީދު ވިދާޅުވީ ކުރީގެ އޮފިސަރުން އަލުން އެމީހުންގެ މަގާމަށް އައުމަކީ އުއްމީދު ކުރައްވާ ކަމެއް ކަމަށެވެ. ދިވެހި އޮފިސަރުންނާއި ފަޅުވެރިންގެ އާ ޖީލެއް އުފެދިގެން އައުމަކީ ކުރައްވާ ވަރަށް ބޮޑު އުއްމީދެއް ކަމަށް ސައީދު ވިދާޅުވިއެވެ. މިވަގުތު އެމްއެސްއެސް އިން ދަތުރުތައް ކުރަނީ ކޮލަމްބޯ އާއި މާލެ އާއި ދެމެދު އެވެ. އެހެން ނަމަވެސް ދުނިޔޭގެ ކޮންމެ ގައުމަކުން ވެސް މުދާ ގެނެވޭނެ ޤާބިލުކަން ރާއްޖޭގެ ޤައުމީ ޝިޕިންގ ކުންފުނީގައި އެބަހުރިކަމަށް ސައީދު ވިދާޅުވި އެވެ.

މި ހަފުލާގައި ވާހަކަ ދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ ދިވެހިންނަކީ މުޅި ދުނިޔޭގައި ފާހަގަ ކޮށްލެވޭ ފަދަ ޝިޕިންގް ލައިނުތަކެއް ހިންގާފައި ތިބި ބައެއް ކަމަށެވެ. އަދި އެމްއެސްއެސް އަކީ ކާމިޔާބު ކަމާއެކު ހިންގޭނެ ކުންފުންޏެއް ކަމާމެދު ޝައްކު ނުކުރާ ކަމަށް ވެސް ޝާހިދު ވިދާޅުވިއެވެ.

މި ޝިޕިންގް ލައިން ކާމިޔާބު ކަމާއެކު ހިންގުމަށް ވެދެއްވެން ހުރި ހުރިހާ އެހީއެއް އެމްޕީއެލްގެ ފަރާތުން ވެދެއްވާނެ ކަމަށް ޝާހިދު ވިދާޅުވިއެވެ. އަދި މި ކުންފުނީގެ މަސައްކަތް ފެށިފައި މިވަނީ މިފަދަ ކުންފުންޏެއްގެ ބޭނުން ރާއްޖެއަށް ވަރަށްބޮޑަށް ޖެހިފައިވާ ދުވަސްވަރެއްގައި ކަމަށްވެސް ޝާހިދު ފާހަގަކުރެއްވި އެވެ.

މޯލްޑިވްސް ސްޓޭޓް ޝިޕިން އަކީ އެސްޓީއޯގެ ސަބްސިޑަރީ ކުންފުންޏެކެވެ.