މިއަދު 9 ސަފާރިއަކާއި 15 ރިސޯޓެއްގައި ތިބި މުވައްޒަފުން އެތަންތަނުން ފޭބުމުގެ ހުއްދަ ދީފައިވާކަމަށް ކޯވިޑް-19 ގެ ޓާސްކްފޯސްގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

މިރޭގެ ނޫސްވެރިންގެ ބައްދަލުވުމުގައި މަބްރޫކް ވިދާޅުވީ، މީގެ ކުރިން މޮނިޓަރިންގެ ހާލަތުގައި އޮތް ރިހިވެލި އަދި ކޮންސްޓެންޓް މޫފުށި ރިސޯޓްގެ މޮނިޓަރިންގެ ހާލަތު ނިމުމަކަށް ގެނެސްފައިވާ ކަމަށެވެ. އަދި އެތަންތަނުން އައިސޮލޭޓް ކުރަންޖެހޭ މީހުން އައިސޮލޭޓް ކުރެވިފައިވާކަމަށް މަބްރޫކް ވިދާޅުވި އެވެ.

މިވަގުތު ރާއްޖޭގައި އައިސޮލޭޝަންގައި 12 މީހުން ތިބިއިރު، ކަރަންޓީނު ފެސިލިޓީތަކުން 73 މީހުން ވަނީ ދޫކޮށްލާފައެވެ. އަދި މިވަގުތު ކަރަންޓީނުގައި ތިބީ 809 މީހުންނެވެ. ކަރަންޓީނުގައި ތިބި މީހުންގެ ތެރެއިން 187 މީހެއްގެ ސާމްޕަލް މިއަދު ނަގާފައިވާކަމަށާއި، އިތުރު 43 މީހެއްގެ ސާމްޕަލް ނެގުމުގެ މަސައްކަތް މިހާރު ވެސް ދަނީ ކުރަމުން ކަމަށް މަބްރޫކް ވިދާޅުވިއެވެ.

ރާއްޖެއިން މިހާތަނަށް ޖުމްލަ 1573 ސާމްޕަލް ނަގާފައިވާއިރު ޕޮޒިޓިވް ވެފައިވަނީ 19 ސާމްޕަލެވެ. އަދި 1489 ސާމްޕަލް ނެގެޓިވް ވެފައި ވާއިރު، މިއަދު ހަވީރު 4 ޖެހުމާއި ހަމައަށް 65 ސާމްޕަލެއްގެ ނަތީޖާ ނުލިބެއެވެ.

މިރޭގެ ނޫސްވެރިންގެ ބައްދަލުވުމުގައި މަބްރޫކް ވިދާޅުވީ، ރާއްޖޭގައި މިހާރު 23 ފްލޫ ކުލިނިކެއް ހިންގަމުންދާކަމަށާއި، މިތަންތަނުން ޖުމްލަ 5959 މީހަކަށް ޚިދުމަތް ދީފައިވާ ކަމަށެވެ. އަދި ފާއިތުވި 24 ގަޑިއިރު 142 މީހަކަށް ޚިދުމަތްދީފައިވާކަމަށް މަބްރޫކް ވިދާޅުވި އެވެ.