މި އަހަރުގެ ފިތުރު ޒަކާތް ރޯދަ މަހުގެ އެކަކުން ފެށިގެން އޮންލައިންކޮށް ބަލައިގަންނަން ނިންމައިފި އެވެ.

ރޯދަ މަހުގެ އެކަކުން ފެށިގެން 27އަށް ބައެއް ވަސީލަތްތައް މެދުވެރިކޮށް ޒަކާތް ދެއްކޭއިރު އަނެއްބައި ވަސީލަތްތަކުން ރޯދަ މަހުގެ އެންމެ ފަހު ދުވަހާ ހަމައަށް ވެސް އޮންލައިންކޮށް ޒަކާތް ދެއްކޭނެ އެވެ.

އިސްލާމިކް މިނިސްޓްރީން މިއަދު ބުނީ އޮންލައިންކޮށް ރޯދަ މަހުގެ އެކަކުން ފެށިގެން 27އަށް ފިތުރު ޒަކާތް ބަލައިގަންނާނީ ދިރާގު އެޕު އަދި ވެބްސައިޓުންންނާއި، އުރީދޫ އެމްފައިސާ އަދި އިސްލާމިކް ބޭންކުގެ އެޕްގެ އިތުރުން ބީއެމްއެލް އެޕުން ކަމަށެވެ.

އަދި ފަހިޕޭ އާއި ފިނޭންސް މިނިސްޓްރީގެ ބަނޑޭރި ޕޯޓަލް މެދުވެރިކޮށް ރޯދަ މަހުގެ އެންމެ ފަހު ދުވަހާ ހަމައަށް ޒަކާތް ދެއްކޭނެ ކަމަށް އިސްލާމިކް މިނިސްޓްރީން ބުނެއެވެ.

އޭގެ އިތުރުން އުމުރުން ދުވަސްވެފައިވާ ފަރާތްތަކާއ،ި އޮންލައިންކޮށް ޒަކާތް ދެއްކުމަށް އަހުލުވެރިނޫން ފަރާތްތަކަށް ހާއްސަކޮށް އިސްލާމީ މަރުކަޒުގެ ޖަލްސާކުރާ މާލަމުގައި ޒަކާތް ބަލައިގަތުމުގެ އިންތިޒާމްތައް ވެސް ވަނީ ހަމަޖައްސައިފަ އެވެ.

އެގޮތުން ކައުންޓަރުތަކުން ޒަކާތް ބަަލައިގަންނާނީ:

02 މާޗު - 20 މާޗު- ރަސްމީ ބަންދުނޫން ކޮންމެ ދުވަހަކު 09:30 ން 13:00 އަށް

23 މާޗު - 30 މާޗު - ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހަކު 11:00 ން 14:00 އަށް