ހުޅުމާލޭގައި ހަދާ ވަގުތީ އިންޖީނުގޭގެ 50 އިންސައްތަ މަސައްކަތް ނިމިފައިވާކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ބުނެފިއެވެ.

މި އިންޖީނުގެއަކީ މާލެ ސަރަޙައްދުގައި އާބާދީ އިތުރުވެ ކަރަންޓު ބޭނުންކުރާ ކެޕޭސިޓީ އިތުރުވަމުންދާތީ މެދުނުކެނޑި ކަސްޓަމަރުންނަށް ކަރަންޓުގެ ހިދުމަތް ފޯރުކޮށްދިނުމުގެ ގޮތުން ހަދާ ތަނެކެވެ.

ދައުލަތުގެ މީޑިއާއަށް ދިން އިންޓަވިއުއެއްގައި މި މަޝްރޫއުގެ އެންމެ ފަހުގެ މައުލޫމާތު ދެމުން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ އިންޖީނުގޭގައި ޖެނެރޭޓަރު ބެހެއްޓުމުގެ މަސައްކަތް ނިމިފައިވާ ކަމަށާއި މިހާރު ކުރަމުންދަނީ ޖަނަރޭޓަރުތައް ޓެސްކުރުމުގެ މަސައްކަތް ކަމަށެވެ.

ފަހުމީ ވިދާޅުވީ މިހާރު ސައިޓުގައި ކުރިއަށްދަނީ އިންޖީނުގެއަށް އަޅާ ކޭބަލްގެ މަސައްކަތްތައް ކަމަށާއި، މަޝްރޫއު ލަސްވަނީ މަގު ކޮނެގެން ކުރާ ބައެއް މަސައްކަތްތައް ހުރުމުން ކަމަށެވެ.

ވަގުތީ އިންޖީނުގެ ހެދުމުގެ މަސައްކަތް ސްޓެލްކޯއިން ފަށާފައިވަނީ މިދިޔަ މަހު ފަހުކޮޅުއެވެ. މި ޕްރޮޖެކްޓްގެ ދަށުން ވަގުތީ އިންޖީނުގޭގައި 13 ޖަނަރޭޓަރު ބަހައްޓައި، ގްރިޑަށް ޖުމްލަ 17 މެގޮވޮޓްގެ ކަރަންޓު ކެޕޭސިޓީ އިތުރުކުރުމަށް ވަނީ ހަމަޖެހިފައެވެ.

މި ހޫނު މޫސުގައި ކަރަންޓު ބޭނުންކުރާ ކެޕޭސިޓީ 120 މެގަވޮޓަށް އިތުރުވެގެންދާނެ ކަމަށް ސްޓެލްކޯއިން ވަނީ އަންދާޒާ ކޮށްފައެވެ. ނަމަވެސް ވަގުތީ އިންޖީނު ބޭނުންކުރަން ފެށުމުން ކޭޕޭސިޓީއަށް ދަތިކަމެއް ނެތި ހިދުމަތް ދެވޭނެކަމުގެ ޔަގީންކަން އޮތް ކަމަށް ސްޓެލްކޯއިން ވަނީ ބުނެފައެވެ.