400 އެމެރިކާ ޑޮލަރަށް ޓިކެޓް ވިއްކާ މޯލްޑިވިއަންގެ ޚާއްޞަ ފްލައިޓުން ޖާގަ ހޯދުމަށް އެދި މެލޭޝިޔާގައި ތިބި 800 އަށް ވުރެ ގިނަ މީހުން މިއަދު މެންދުރާއި ހަމައަށް ރަޖިސްޓްރީވެފައިވާ ކަމަށް މައުލޫމާތު ލިބިއްޖެއެވެ.

މެލޭޝިއާއިން ރާއްޖެ އަންނަން ބޭނުންވާ ދިވެހިން ގެންނަ މޯލްޑިވިއަންގެ ބޯޓު މެލޭޝިއާއިން ފުރުމަށް ތާވަލުކޮށްފައިވަނީ މި މަހުގެ 8 ވަނަ ދުވަހު މެލޭޝިއާ ގަޑިން ހެނދުނު 6 ޖަހާއިރުއެވެ.

"ރަސް އޮންލައިން" އަށް މައުލޫމާތު ލިބިފައިވާ ގޮތުގައި މެލޭޝިޔާއާއި ދިވެހިރާއްޖެއާ ދެމެދު މޯލްޑިވިއަނުން ބާއްވަން ރާވާފައިވާ ފްލައިޓުން މާލެ ދަތުރު ކުރަން ބޭނުންވާ ފަރާތްތައް ރަޖިސްޓްރީ ކުރަން ހުޅުވާލުމުން މިއަދު މެންދުރު 12:00 އާއި ހަމަށް 800 އަށް ވުރެ ގިނަ ދިވެހިން މާލެ އަންނަން ރެޖިސްޓަރީ ކޮށްފައިވެއެވެ. މައުލޫމާތު ލިބިފައިވާ ގޮތުގައި 200 މީހުންގެ ޖާގައިގެ މޯލްޑިއަން ފްލައިޓްގެ ޓިކެޓް ގަންނަން ބޭނުންވާ ފަރާތްތަކަށް މިއަދު ހަވީރު 5:00 އިން ފެށިގެން އޮންލައިންކޮށް ޓިކެޓް ގަންނަން ލިބޭނެއެވެ.

މެލޭޝިއާގައި ހުންނަ ދިވެހި ހައިކޮމިޝަނާއި ހަވާލާދީ މެލޭޝިއާގައި ހުރި ދިވެއްސަކު މިނޫހަށް މައުލޫމާތު ދިން ގޮތުގައި ހައި ކޮމިޝަނުން ބުނެފައިވަނީ މިހާރު ކަންކަން ހަމަޖެހިފައިވާ ގޮތުން މި ފްލައިޓުން ދަތުރު ކުރަން ބޭނުންވާ ފަރާތްތަކަށް ބުކިން ހަދައިދިނުމާއި، ޓިކެޓް ވިއްކުމުގެ ކަންކަން ހަމަޖައްސާނީ ސީދާ މޯލްޑިވިއަނުންނެވެ.

މޯލްޑިވިއަނުން ކުރި ޓްވީޓެއްގައި ބުނެފައިވަނީ، މިއަދު ހަވީރު 5:00 އިން ފެށިގެން އޮންލައިންކޮށް ޓިކެޓް ގަންނަން ލިބޭނެ ކަމަށެވެ.

މެލޭޝިޔާގައި ތިބި ދިވެހިންގެ ތެރެއިން އެނބުރި ރާއްޖެ އަންނަން ބޭނުންވާ މީހުން ގެނައުމުގެ ނަމުގައި ދިވެހި ޤައުމީ ކުންފުނިން ބާއްވާ ފްލައިޓްގެ އެއްކޮޅު ޓިކެޓެއްގެ އަގަކީ 400 ޑޮލަރު ނުވަތަ 6،168 ދިވެހި ރުފިޔާއެވެ. މެލޭޝިއާގެ އިތުރުން މޯލްޑިވިއަނުން ވަނީ އިންޑިއާގެ ކޮޗިންއާ ޓްރިވެންޑްރަމްގައި ތިބި ދިވެހީން ގެނައުމަށް ޚާއްޞަ ދަތުރުތަކެއް ބާއްވަން ތާވަލުކޮށްފައެވެ.

ކޯވިޑް-19 އާއި ގުޅިގެން ޤައުުތަކުގެ ވައިގެ ދަތުރުތައް ހުއްޓާލައި ލޮކްޑައުން ކޮށް ކާފިއު ހިންގާފައިވާތީ ޤައުމަށް ނާދެވި އަދި ހާލުގައި ޖެހިފައި ތިބި މީހުން ގެނައުމުގެ ނަމުގައި މޯލްޑިވިއަނުން ކޮޗިންއަށް ކުރާ ދަތުރުގެ އެއްކޮޅު ޓިކެޓް ވިއްކަނީ 4،086 ރުފިޔާއަށެވެ. އަދި ލަންކާ ޓިކެޓް ވިއްކީ 4،626 ރުފިޔާއަށެވެ. އެހެން ނަމަވެސް މީގެކުރިން ލަންކާއާ ދެމެދުގެ ދެކޮޅު ޓިކެޓް މޯލްޑިވިއަނުން 4،142 ރުފިޔާއަށް ލިބެއެވެ. ރާއްޖެ-ކޮޗިންގެ ދެކޮޅު ޓިކެޓް އާއްމުކޮށް 2،775 ރުފިޔާ އަށް ލިބެއެވެ.

ކޯވިޑް-19 ގެ ޚާއްޞަ ހާލަތާއި ގުޅިގެން ނާދެވިފައި ތިބި ބަޔަކު ގެންނަން ޤައުމީ އެއަރލައިނުން ކުރާ ދަތުރު ތަކުގެ ޓިކެޓްގެ އަގުތައް ކުރިން ވިއްކާފައިވާ އަގަށްވުރެ ބޮޑުކޮށްފައިވާތީ ބައެއް ފަރާތްތަކުން ދަނީ ފާޑުކިޔަމުންނެވެ. އެފަދަ ފަރާތްތަކުން ބުނީ ޤައުމީ އެއަރލައިނުން މިފަދަ ހައްސާސް ދަނޑިވަޅެއްގައިވެސް ބަލަނީ ރައްޔިތުން އަތުން ނެގެން އޮތް އެންމެ ބޮޑު ފައިދާއެއް ނަގައިގެން ބަނގުރޫޓުވާ ހިސާބަށް ގޮސްފައިވާ ކުންފުނީގެ މުވައްޒަފުންނަށް މުސާރަ ދެވޭވަރަށް ފައިސާ ހޯދުމަށެވެ. އަނެއް ބަޔަކު ބުނަނީ ޤައުމުން ބޭރުގައި ނާދެވިފައި ތިބި ބަޔަކަށް ރަށަށް އައުމުގެ ފުރުސަތު ހޯދައިދިނުމަކީ ޝުކުރުވެރިވާން ޖެހޭ ކަމެއް ކަމަށެވެ.