ހޮލީވުޑްގެ މަޝްހޫރު ތަރިން ބްލޭކް ލައިވްލީ އާއި ޖަސްޓިން ބަލްޑޯނީގެ ދެމެދުގައި ހިނގަމުންދާ މައްސަލަތަކަށް ބިނާކޮށް ޑޮކިއުމެންޓަރީއެއް އުފައްދަން އުޅޭ ކަމަށް މީޑިއާތަކުން ރިޕޯޓު ކޮށްފިއެވެ.

މި ދެ ތަރިންގެ ދެދުގައި މައްސަލަތަކެއް ދިމާވެފައިވަނީ "އިޓް އެންޑް ވިތު އަސް" ނެރުނު ފަހުންނެވެ. މި ފިލްމު ނެރުނު ފަހުން ބްލޭކު ވަނީ ބާރުގެ ބޭނުން ނަހަމަ ގޮތުގައި ހިފި ކަމުގެ ތުހުމަތާއި، ބޭނުންވާ ކަމެއް ހާސިލް ނުކުރެވުމުން ބަދަލު ހިފުމަށް ކަންތަކެއް ކުރި ކަމުގެ ތުހުމަތު ކޮށް ޖަސްޓިންގެ މައްޗަށް ދައުވާ އުފުލާފައެވެ. ނަމަވެސް މިކަމަށް ޖަސްޓިން ވަނީ އިންކާރު ކޮށްފައެވެ. އަދި ޖަސްޓިން ވަނީ ބްލޭކް އަދި އޭނާގެ ފިރިމީހާ ރަޔަން ރެނޮލްޑްސްގެ މައްޗަށް އަބުރު ކަތިލުމުގެ ދައުވާ އުފުލާފައެވެ.

އަދި ދާދި ފަހުން ބްލޭކް އަދި ރަޔަން ވަނީ ޖަސްޓިން ކުރާ ދައުވާ ބާތިލު ކުރުމަށް އެދި ހުށަހަޅާފައެވެ. އެމީހުން މި ދައުވާ ބާތިލު ކުރުމަށް އެދި ހުށަހެޅީ ވަކިންނެވެ.

މިއީ ފަހުގެ ޒަމާނެއްގައި ހޮލީވުޑްގައި ހިނގައިދިޔަ އެންމެ ބޮޑު "ގާނޫނީ ހަނގުރާމަ" އޭ ބުނުމަކީ ދޮގަކަށް ނުވާނެއެވެ. އަދި މިއީ ހޮލީވުޑްގައި އެންމެ މަޝްވަރާކުރެވޭ އެއް މައުޟޫއޭ ބުނުމަކީވެސް ދޮގެއް ނޫނެވެ.

އެހެންވެ، މި ގާނޫނީ ހަނގުރާމައިގެ މައްޗަށް ބިނާކޮށް ޑޮކިއުމެންޓަރީއެއް އުފައްދަން ގިނަ ފަރާތްތަކަކުން ވަނީ ނިންމާފައެވެ. މި ޑޮކިއުމެންޓަރީ އަށް ނަން ދޭން ނިންމާފައިވަނީ "ބަލްޑޯނީ ވާސަސް ލައިވްލީ: އަ ހޮލީވުޑް ފިއުޑް" ގެ ނަމުންނެވެ.

ޑޮކިއުމެންޓަރީގައި މި މައްސަލަތައް ދިމާވާން މެދުވެރިވި ސަބަބުތަކާއި، މައްސަލައިގެ އަދާހަމަ ގެނެސްދޭން ނިންމާފައިވާ ކަމަށް ރިޕޯޓުގައި ވެއެވެ. އަދި މި މައްސަލައާ ގުޅޭ މައުލޫމާތުގެ ތަފްސީލުވެސް ޑޮކިއުމެންޓަރީ އިން ފެންނާނެ ކަމަށް ރިޕޯޓުގައި ވެއެވެ.

ޑޮކިއުމެންޓަރީ ނެރޭ ދުވަހެއް އަދި ހާމަކޮށްފައެއް ނުވެއެވެ. ނަމަވެސް ޑޮކިއުމެންޓަރީ ނެރުމުން ޑިޒްނީ ޕްލަސް އިން ބެލޭނެ ކަމަށް ރިޕޯޓުތަކުގައި ވެއެވެ.