ރައީސް މައުމޫން، ފޮޓޯ: ގޫގުލް
ރައީސް މައުމޫން، ފޮޓޯ: ގޫގުލް
ފަތުރުވެރިކަން އިޝްތިހާރު ކުރުމަށްޓަކައި ކްލަބު ލިވަޕޫލާއެކު ކެމްޕެއިނެއް ހިންގުމަށް ހަމަޖައްސާފައިވާތީ ކުރީގެ ރައީސް އަލްއުސްތާޒު މައުމޫން އަބްދުލް ގައްޔޫމު ޝުކުރު އަދާކުރައްވައިފިއެވެ.

އެކްސްގައި ހިއްސާ ކުރެއްވި ޕޯސްޓެއްގައި ރައީސް މައުމޫން ވިދާޅުވީ 1970 ގެ އަހަރުތަކުން ފެށިގެން އެމަނިކުފާނަކީ ލިވަޕޫލް ފުޓްބޯޅަ ކުލަބުގެ ސަޕޯޓަރެއް ކަމަށެވެ.

އަދި މިރޭ އެލްއެފްސީގައި ލިވަޕޫލް - ވިޒިޓްމޯލްޑިވްސް ކެމްޕެއިން ފަށާތީ ސަޕޯޓަރެއްގެ ހައިސިއްޔަތުން އެކަމާ އުފާ ކުރައްވާ ކަމަށް ރައީސް މައުމޫން ވިދާޅުވިއެވެ.

ސަރުކާރުން މި މަސައްކަތް ފެއްޓެވުމާ ގުޅިގެން އެމަނިކުފާނު ވަނީ ރައީސް ޑރ. މުހައްމަދު މުއިއްޒަށް ޝުކުރު ދަންނަވާފައެވެ.

އިނގިރޭސިވިލާތުގެ ލިވަޕޫލް ފުޓްބޯލް ކްލަބް (އެލް.އެފް.ސީ) އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަންގެ ވިޒިޓް މޯލްޑިވްސްއާ ގުޅިގެން، ދިވެހިރާއްޖޭގެ ފަތުރުވެރިކަން އިސްތިހާރު ކުރުމަށް ކުރިއަށްގެންދާ ކޯ-ބްރޭންޑް ކެމްޕޭން ރަސްމީކޮށް ފެށުމަށް ހަމަޖެހިފައި ވަނީ މިރޭ އެކަމަށް ބާއްވާ ރަސްމިއްޔާތެއްގައެވެ.

ލިވަޕޫލް އެފްސީގެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރު" ގެ ގޮތުގައި ދިވެހިރާއްޖެ ހަމަޖައްސައި އެމް.އެމް.ޕީ.އާރު.ސީ/ވިޒިޓް މޯލްޑިވްސް އިން އެކަން ހާމަ ކުރީ، މިދިޔަ މާރިޗު މަހުގެ 13 ވަނަ ދުވަހު އެވެ.

މިއީ ދިވެހިރާއްޖޭގެ ފަތުރުވެރިކަމުގެ ބްރޭންޑް ވާސިލުވާ މިންވަރު އިތުރުކޮށް، ރާއްޖެއަށް ޒިޔާރަތްކުރުމަށް އިތުރު ފަތުރުވެރިންނަށް ހިތްވަރު ދިނުމުގެ ގޮތުން، 3 އަހަރު ދުވަހަށް ވުރެ ދިގު މުއްދަތަކަށް ކުރިއަށް ގެންދާ، ބައިނަލްއަޤުވާމީ ކެމްޕޭނެކެވެ.



ކިޔުންތެރިންގެ ހިޔާލު



ޓްރެންޑިން