ދިވެހިރާއްޖޭގައި ނިރުބަވެރި ހަމަލާއެއް ދީފާނެ ކަމުގެ އިންޒާރު އިނގިރޭސިވިލާތުން ދީފިއެވެ. މި އިންޒާރު ދީފައި ވަނީ އިނގިރޭސިވިލާތުގެ ފޮރިން މިނިސްޓްރީންނެވެ.

އިނގިރޭސިވިލާތުގެ ފޮރިން މިނިސްޓްރީން ނެރުނު ޓްްރެވެލް އިންޒާރެއްގައި ބުނެފައިވަނީ ރާއްޖެއަށް ނިރުބަވެރި ހަމަލާގެ ނުރައްކާ އޮތް ކަމަށާއި އެފަދަ ކަމަކުން ސަލާމަތްވެ ނުވަތަ އެފަދަ ހަމަލާއެއް ނުހުއްޓުވޭނެ ކަމަށެވެ.

މިނިސްޓްރީން ބުނީ އެފަދަ ހަމަލާތަކަކީ އެކި ގައުމުތަކުގެ މީހުން ރާއްޖެ ޒިޔާރަތްކޮށް ދާ ތަންތަން ހިމެނޭ ގޮތަށް ދެވިދާނެ ހަމަލާތަކެއް ކަމަށެވެ. އަދި އެފަދަ ތަންތަނަށް ޒިޔާރަތް ކުރާ ފަތުރުވެރިން އެކަމާއި ހޭލުންތެރިވެ، މީޑިއާ ރިޕޯޓްތަކާއި ކަމާއި ބެހޭ ފަރާތްތަކުގެ އިރުޝާދާ އެއްގޮތަށް އަމަލު ކުރުމަށް މިނިސްޓްރީން ވަނީ އިލްތިމާސް ކޮށްފައެވެ.

ފޮރިން މިނިސްޓްރީން ބުނީ، އިސްރާއީލުން ފަލަސްތީނުގެ ބިންތަކުގައި ހިންގަމުންދާ ހަމަނުޖެހުންތަކުގެ ސަބަބުން ދުނިޔޭގެ އެކިކަންކޮޅުތަކުގައި ނުތަނަވަސްކަން ބޮޑުވެފައިވާ ކަމަށެވެ.

އަލްގައިދާ އާއި ދާއިޝް ފަދަ ނިރުބަވެރި ޖަމާއަތްތަކުން ވަނީ ރައްދުގައި ނިރުބަވެރި ހަމަލާތައް ދިނުމަށް އެ ޖަމާއަތްތަކަށް ތާއިދު ކުރާ ފަރާތްތަކަށް ގޮވާލާފައެވެ. އަދި މި ހަމަނުޖެހުންތަކުގެ ސަބަބުން ރާއްޖޭގައި ވެސް އެފަދަ ހަމަލާއެއް ދިނުމަކީ، އެކަން ކުރާ ފަރާތްތަކަށް ހިތްވަރު ލިބިގެންދާނެ ކަމެއް ކަމަށް ވަނީ މިނިސްޓްރީން ބުނެފައެވެ.