އިނގިރޭސި ވިލާތުގެ ލިވަޕޫލަށް ރައީސް ކުރައްވާ ދަތުރުފުޅުން އަންގައިދެނީ ރައްޔިތުންގެ ހައްގުގައި އެމަނިކުފާނު ވެވަޑައިގަންނަވާ ގުރުބާނީތައް ކަމަށް ލޯކަލް ގަވަމެންޓް މިނިސްޓަރ އާދަމް ޝަރީފް އުމަރު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ މި ދަތުރުފުޅާ ގުޅޭ ގޮތުން އެކްސްގައި ހިއްސާ ކުރެއްވި ޕޯސްޓެއްގައެވެ.

އެގޮތުން މިނިސްޓަރ އާދަމް ވިދާޅުވީ ފަތުރުވެރިކަމުގެ ސިނާއަތުގައި ރާއްޖެއަށް އިތުރު ފުރުސަތުތައް ހޯއްދަވައިދެއްވުމަށާއި ރާއްޖޭގެފަތުރުވެރިކަން އިސްތިހާރު ކުރެއްވުމަށްޓަކައި، ދުނިޔޭގެ އެންމެ މަޝްހޫރު އެއް ފުޓްބޯޅަ ކްލަބާއެކު "ދަނޑަށް" ނިކުމެވަޑައިގަތުމަކީ ދިވެހި ގައުމާއި ރައްޔިތުންގެ ހައްގުގައި ރައީސް ޑރ. މުހައްމަދު މުއިއްޒު ވެވަޑައިގަންނަވާ ގުރުބާނީއާއި އެމަނިކުފާނުގެ ސާބިތުކަން އަންގައިދޭ ކަމެއް ކަމަށެވެ.

މި އިސްނެންގެވުމުގެ ސަބަބުން ރާއްޖޭގެ ފަތުރުވެރިކަމަށް ހެޔޮ ބަދަލުތަކެއް އަންނާނެކަމަށް އުންމީދު ކުރެވޭ ކަމަށްވެސް މިނިސްޓަރު ވަނީ ވިދާޅުވެފައެވެ.

ފަތުރުވެރިކަމުގެ ސިނާޢަތުގައި ރާއްޖެއަށް އިތުރު ފުރުޞަތުތައް ހޯއްދަވައިދެއްވުމަށާއި ރާއްޖޭގެ ފަތުރުވެރިކަން އިސްތިހާރު ކުރެއްވުމަށްޓަކައި، ދުނިޔޭގެ އެންމެ މަޝްހޫރު އެއް ފުޓްބޯޅަ ކްލަބާއިއެކު “ދަނޑަށް” ނިކުމެވަޑައިގަތުމަކީ ދިވެހި ޤައުމާއި ރައްޔިތުންގެ ޙައްޤުގައި… https://t.co/hUwrCsx6bC

— Adam Shareef Umar (@Adamshareefz) April 2, 2025

ލިވަޕޫލް ފުޓަބޯޅަ ކްލަބާއެކު ރާއްޖޭގެ ފަތުރުވެރިކަން އިޝްތިހާރު ކުރުމުގެ ކެމްޕޭނަކީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އަދި ވިޒިޓް މޯލްޑިވްސްއާ ގުޅިގެން ހިންގާ ކެމްޕޭނެކެވެ. މި ކެމްޕޭން ލޯންޗުކޮށް، އެ ކްލަބުގެ ދަނޑުގައި ރޭ ވަނީ ރާއްޖެ އިޝްތިހާރުކުރަން ފަށާފައެވެ.

އެމްއެމްޕީއާރުސީން ބުނެފައިވަނީ މި ކެމްޕޭންގެ ސަބަބުން ޓޫރިޒަމާއި އިގްތިސާދީ ގޮތުން ރާއްޖެއަށް ބޮޑެތި ފައިދާތަކެއް ލިބިގެންދާނެ ކަމަަށެވެ.