ދިވެހި ރާއްޖެއަށް ނިރުބަވެރިންގެ ނުރައްކަލެއް ނެތްކަން ސަރުކާރުން ޔަގީންކޮށްދޭން ޖެހޭ ކަމަށް ރާއްޖޭގެ އެންމެ ވަރުގަދަ އެއް ޓްރެވަލް އޭޖެންސީ، އިނަ މޯލްޑިވްސްގެ ވެރިޔާ މުހައްމަދު ފިރާގު ވިދާޅުވެއްޖެއެވެ.

ފިރާގު ވިދާޅުވީ ރާއްޖޭގައި ނިރުބަވެރި ހަމަލާއެއްގެ އިންޒާރު އިނގިރޭސިވިލާތުން މީގެ ކުރިންވެސް ދީފައިވާ ކަމަށާއި މިކަން ރަނގަޅުކުރެވޭނީ ލޮބީކޮށް އެފަދަ ނުރައްކަލެއް ނެތްކަން ޔަގީންކޮށްދީގެން ކަމަށެވެ.

”ދެން މިކަން ރަނގަޅުކުރެވޭނީ އިހުގެ ސަރުކާރުތަކުން ކަން ކުރިފަދައިން ލޮބީކޮށް އެފަދަ ނުރައްކަލެއް ނެތްކަން ޔަގީން ކޮށް ދޭނީ. އަދި މިކަމާގުޅޭގޮތުން ޑިޕޮލޮމެޓިކް ލެވެލް އެއްގައި ވާހަކަ ދައްކާނީ.“ ފިރާގު ވިދާޅުވިއެވެ.

ރާއްޖޭގައި ނިރުބަވެރި ހަމަލާއެއް ދީފާނެ ކަމުގެ އިންޒާރު ދީފައިވަނީ އިނގިރޭސިވިލާތުންނެވެ. މި އިންޒާރު ދީފައި ވަނީ އިނގިރޭސިވިލާތުގެ ފޮރިން މިނިސްޓްރީންނެވެ. އެގޮތުން ފޮރިން މިނިސްޓްރީން ނެރުނު ޓްްރެވެލް އިންޒާރެއްގައި ބުނެފައިވަނީ ރާއްޖެއަށް ނިރުބަވެރި ހަމަލާގެ ނުރައްކާ އޮތް ކަމަށާއި އެފަދަ ކަމަކުން ސަލާމަތްވެ ނުވަތަ އެފަދަ ހަމަލާއެއް ނުހުއްޓުވޭނެ ކަމަށެވެ.

ފޮރިން މިނިސްޓްރީން ބުނީ އެފަދަ ހަމަލާތަކަކީ އެކި ގައުމުތަކުގެ މީހުން ރާއްޖެ ޒިޔާރަތްކޮށް ދާ ތަންތަން ހިމެނޭ ގޮތަށް ދެވިދާނެ ހަމަލާތަކެއް ކަމަށެވެ. އަދި އެފަދަ ތަންތަނަށް ޒިޔާރަތް ކުރާ ފަތުރުވެރިން އެކަމާއި ހޭލުންތެރިވެ، މީޑިއާ ރިޕޯޓްތަކާއި ކަމާއި ބެހޭ ފަރާތްތަކުގެ އިރުޝާދާ އެއްގޮތަށް އަމަލު ކުރުމަށް މިނިސްޓްރީން ވަނީ އިލްތިމާސް ކޮށްފައެވެ.