އިންޑިއާގެ ކަޝްމީރުގައި ގާއިމުކޮށްފައިވާ ދުނިޔޭގެ އެންމެ އުސް ރޭލްވޭ ބްރިޖް ހުޅުވައިފިއެވެ.

މިބްރިޖް ރަސްމީކޮށް ހުޅުވައިދެއްވީ އިންޑިއާގެ ބޮޑުވަޒީރު ނަރެންދްރަ މޯދީ މިދިޔަ ހުކުރު ދުވަހުއެވެ.

މި ބްރިޖަކީ ޕެރިހުގެ އެއިފެލް ޓަވަރަށްވުރެއް 35 މީޓަރު އުސްކޮށް، ޗެނަބް ކޯރުގެ 359 މީޓަރު މަތީގައި ގާއިމުކޮށްފައިވާ ބްރިޖެކެވެ. މި ބްރިޖަކީ އިންޑިއާގެ އުދަމްޕޫރު-ސްރީނަގަރު-ބަރަމުއްލާ ގުޅުވައިދޭ ރޭލު މަގެކެވެ. 160 މިލިއަން ޑޮލަރުގެ މި މަޝްރޫއުގެ ދިގުމިނަކީ 1،315 މީޓަރެވެ. މިއީ ކަޝްމީރާއި އިންޑިއާގެ އެހެން ސަރަހައްދުތަކާއި ގުޅުވައިދޭ ފުރަތަމަ ރޭލު މަގެވެ.



މި ބްރިޖް ހުޅުވައިދީ ރޭލުމަގު އިފްތިތާހު ކުރެއްވުމަށް ބޮޑުވަޒީރު މޯދީ ކަޝްމީރަށް ވަޑައިގަނެފައިވާއިރު، މިއީ މިދިޔަ އޭޕްރީލް މަހު ޕާކިސްތާނާއި އިންޑިއާ ދެމެދު ކަޝްމީރު ބޯޑަރު ސަރަހައްދުގައި ހިނގާދިޔަ ހަމަނުޖެހުންތަކަށްފަހު މޯދީ ކަޝްމީރަށް ވަޑައިގެންނެވި ފުރަތަމަ ފަހަރެވެ.

މި އާ ރޭލްވޭ ލިންކަކީ އިންޑިއާގެ ދަތުރުފަތުރުގެ ނެޓްވޯކް ކުރިއަރުވައި، އިގްތިސާދީ ކުރިއެރުން ހޯދުމަށް ކުރާ ދަތުރުގައި ތަސައްވުރުގެ ކުރެހުމުގައި ކުލަ ޖެހުމުގެ ކުރިއެރުމުގެ ބައެއްކަމަށް ރިޕޯޓުތައް ބުނެއެވެ.