ކާބޯތަކެތީގެ ހިދުމަތްދޭ ތަންތަނުގެ ސާފުތާހިރުކަން ބެލުމަށް މާލެ ސަރަހައްދުގައި ފެށި އިންސްޕެކްޝަނުގެ ތެރެއިން 45 ތަނެއް ބަންދުކޮށްފިއެވެ.

ފުޑް އެންޑް ޑްރަގު އޮތޯރިޓީ އާއި މާލޭ ސިޓީ ކައުންސިލާއި އެޗްޑީސީ ގުޅިގެން މާލޭ ސަރަހައްދުގައި އެ އިންސްޕެކްޝަން ފެށީ މިދިޔަ އާދިއްތަ ދުވަހުއެވެ.

އެ އިންސްޕެކްޝަންގެ އަދާހަކަ ހާމަކޮށް މާލޭ ސިޓީ ކައުންސިލުން ބުނީ، އިއްޔެއާ ހަމައަށް 400 ތަނެއް ބަލައި ފާސްކޮށް 45 ތަނެއް ބަންދުކޮށްފައިވާ ކަމަށެވެ. އޭގެ ތެރޭގައި ސާފުތާހިރުކަން ދަށްވެގެންނާއި ހުއްދަ ނުހޯދައި ކާބޯތަކެތީގެ ހިދުމަތްދޭ ތަންތަން ހިމެނޭ ކަމަށް ކައުންސިލުން ބުނެފައިވެއެވެ.

މާލެ ސިޓީ ކައުންސިލްގެ ކޮމިއުނިޓީ އެންގޭޖްމެންޓް ޔުނިޓާއި، މޯލްޑިވްސް ފްޑް އެންޑް ޑްރަގް އޮތޯރިޓީއާއި ގުޅިގެން މާލެ ، ވިލިމާލޭގައި ހުރި ކާބޯތަކެތި
ހަދާ ތަންތަން އިންސްޕެކްޓް ކުރުމުގެ ޖޮއިންޓް އޮޕަރޭޝަންގައި ފާއިތުވި 4 ދުވަހު 400 ތަނެއް ބަލާ ޗެކުކޮށް 45 ތަން ވަނީ ބަންދުކުރެވިފައި… pic.twitter.com/r9BoPjZKQe

— Malé City Council (@MaleCitymv) September 24, 2025

މި އިންސްޕެކްޝަނުގައި އެ ތަންތަން ބަންދުކޮށް ޢިމާރާތުގެ ބޭރުގައި ނޯޓިސް ހަރުކޮށްފައިވެއެވެ.

މި އޮޕަރޭޝަން ކުރިއަށް ގެންދިއުމަށް ހަމަޖެހިފައިވަނީ، މި ސެޕްޓެމްބަރ މަހުގެ 21 އިން 25 އަށެވެ. އަދި މި އޮޕަރޭޝަނުގައި ބަލަންޖެހޭ ގިނަ ތަންތަން ހުރުމާއެކު، މި މުއްދަތު އިތުރު ކުރުމަށް މިހާރު ވަނީ ނިންމައިފައެވެ.

ކާބޯތަކެތީގެ ރައްކާތެރިކަމުގެ ގާނޫނުގެ ދަށުން، ކާބޯތަކެތީގެ ހިދުމަތްދޭ ތަންތަން އެމްއެފްޑީއޭގައި ރަޖިސްޓަރީ ކުރުމަކީ ލާޒިމް ކަމެކެވެ.