މުޖުތަމަޢުގައި އުޅޭ އެކިކަހަލަ ނުކުޅެދުންތެރިކަން ހުންނަ ދަރިވަރުން ހިމެނޭގޮތަށް "އިންކްލޫސިވް އެޑިޔުކޭޝަން" ފޯރުކޮށްދިނުމަކީ ސަރުކާރުގެ މުހިއްމު ސިޔާސަތެއް ކަމަށާއި، މިއަދު ހުޅުވި ޝަހީދު ޢަލީ ސްކޫލްގައި އެ ފެސިލިޓީ ޤާއިމްކޮށްފައިވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ހުޅުމާލޭ ފޭސް 2 ގައި މިއަދު ބޭއްވި ޝަހީދު ޢަލީ ސްކޫލް ރަސްމީކޮށް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. އެގޮތުން އެމަނިކުފާނު ވިދާޅުވީ ރާއްޖޭގެ އެހެން ސަރަޙައްދުތަކުގައިވެސް "އިންކްލޫސިވިޓީ" އިތުރުކުރުމަށްޓަކައި ސަރުކާރުން މަސައްކަތް ކުރަމުންދާނެ ކަމަށާއި، އެކަމަށް މިއަހަރު ޚާއްޞަ މަސައްކަތްތަކެއް ކުރުމަށް ހަމަޖެހިފައިވާ ކަމަށެވެ.

މި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ރާއްޖޭގެ ހުރިހާ ދަރިވަރުންވެސް ފަތިސް ނަމާދަށް ގަޑިއަށް ހޭލައި، ނަމާދުން ދުވަސް ފެށުމަށް ޢަޒުމް ކަނޑައެޅުމަށް އިލްތިމާސްކުރައްވާފައެވެ. އަދި ހުރިހާ ކިޔަވާ ކުދިން ދުވަސް ފަށަނީ ގަޑިއަށް ފަތިސް ނަމާދުކޮށްގެންތޯ ކަށަވަރު ކުރުމަކީ މައިންބަފައިގެން ޒިއްމާއެއް ކަމަށް ދެކިވަޑައިގެން، އެކަން ކަށަވަރުކުރެއްވުމަށް ބެލެނިވެރިންގެ ކިބައިން އެމަނިކުފާނު އެދިވަޑައިގެންނެވިއެވެ.

ރައީސް ވިދާޅުވީ، ނަމާދަށް ފަރުވާތެރިވުމާއި، މައިންބަފައިންނަށް ކިޔަމަންތެރިވުމާއި، ޓީޗަރުންނާއި ސްކޫލްތަކުގެ ވެރިންގެ ބަސްއެހުމަކީ ތުއްތު ކުދިންގެ މުސްތަޤްބަލަށް އެޅޭ ވަރުގަދަ ބިންގަލެއް ކަމަށެވެ. އަދި ދަރިވަރުން ބޮޑެތިވެގެން ކުރިއަށްދާއިރު އެ ބިންގާ ބަލިކަށިވެ، ރެނދުއަޅާފައިވާނަމަ ޙަޔާތުގައި ބޮޑެތި ގެއްލުންތަކަކާ ކުރިމަތިލާން ޖެހޭނެކަން އެމަނިކުފާނު ފާހަގަކުރެއްވިއެވެ. އެހެންކަމުން، އެ ބިންގާ ވަރުގަދަކުރުމަށްޓަކައި ނަފްސާނީ ގޮތުން ދަރިވަރުން ތައްޔާރުކޮށް މަގުދައްކައި ދިނުމަކީ ޓީޗަރުންނާއި ބެލެނިވެރިންގެ ޒިއްމާއެއް ކަމަށާއި، އެކަމަށް ސަރުކާރުން މަގުފަހި ކޮށްދެއްވާނެ ކަމުގެ ޔަޤީންކަން ރައީސް ދެއްވިއެވެ.

މިއަދު ހުޅުވުނު ޝަހީދު ޢަލީ ސްކޫލާ ގުޅޭގޮތުން ވާހަކަފުޅު ދައްކަވަމުން ރައީސް އެދިވަޑައިގެންނެވީ ސަރުކާރާ ގުޅިގެން ލިބޭ މިފަދަ ފުރުސަތުތަކަކީ "ރަނުގެ ފުރުސަތެއް" ކަމުގައި ބަލައި، އަޚްލާޤް ރަނގަޅު، ދީނީ ބިންގާ ވަރުގަދަ ދަރިވަރުންތަކަކަށް ވުމަށެވެ.

މި ރަސްމިއްޔާތުގައި ސްކޫލްގެ ލޯގޯ އިފްތިތާޙްކޮށްފައިވާއިރު، ރައީސުލްޖުމްހޫރިއްޔާއަށް ވަނީ ހަނދާނީ ހަދިޔާއެއް އަރުވާފައެވެ. ރަސްމިއްޔާތުގައި އެޑިޔުކޭޝަން މިނިސްޓަރ ޑޮކްޓަރ އިސްމާޢީލް ޝަފީޢު އާއި ސަރުކާރުގެ ބައެއް ވަޒީރުންނާއި އިސްވެރިން ބައިވެރިވެވަޑައިގެންނެވިއެވެ.

ހުޅުމާލޭ ފޭސް 2 ގައި މިއަދު ހުޅުވި ޝަހީދު ޢަލީ ސްކޫލަކީ ގްރޭޑް 1 އިން 10 އަށް ކިޔަވައިދޭ ގޮތަށް ފަރުމާކޮށްފައިވާ ސްކޫލެކެވެ. އިއްޔެގެ ނިޔަލަށް 2000 އަށް ވުރެ ގިނަ ދަރިވަރުން އެންރޯލްވެފައިވާ މި ސްކޫލުގައި 54 ކްލާސްރޫމާއި، 3 ސައިންސް ލެބާއި، ލައިބްރަރީއަކާއި، ކޮމްޕިއުޓަރު ލެބާއި އިންޑޯ ހޯލަކާއި ކުޅިވަރު ކުޅޭނެ ތަންތަން ހިމެނެއެވެ.