މޯލްޑިވްސް ނާރސިންގ އެންޑް މިޑްވައިފަރީ ކައުންސިލްގައި ދިވެހި ނަރުހުން ރަޖިސްޓްރީ ކުރުމާއި ލައިސަންސް އައުކުރުމުގެ އުސޫލަށް މުހިންމު ބަދަލުތަކެއް ގެނައުމަށް އެ ކައުންސިލުން ނިންމައިފިއެވެ.

ނާރސިންގ ކައުންސިލުން ކުރި އިއުލާނެއްގައި ބުނެފައިވަނީ، މި ބަދަލުތަކަކީ ނަރުހުންގެ ފެންވަރު ހިފެހެއްޓުމާއި، ރަޖިސްޓްރީކުރުމުގެ ނިޒާމު އިތުރަށް ހަރުދަނާކުރުމަށް ކުރެވޭ މަސައްކަތުގެ ބައެއް ކަމަށެވެ. އެގޮތުން އަލަށް ރަޖިސްޓްރީވުމަށް ހުށަހަޅާ ގިނަ ފަރާތްތަކުން ކޯސް ނިންމިކަމުގެ ލިޔުން ހުށަހެޅި ނަމަވެސް، އަސްލު ކޮލިފިކޭޝަން ސެޓްފިކެޓް ހުށަނާޅާކަން ފާހަގަކުރެވިފައިވާ ކަމަށް އިޢުލާނުގައިވެއެވެ.

މިހާރު އަމަލުކުރަމުންދާ އުސޫލުގެ ދަށުން، ކޯސް ނިންމިކަމުގެ ލިޔުމަށް ބިނާކޮށް ދާއިމީ ރަޖިސްޓްރޭޝަނަކާއެކު ޕްރޮވިޝަނަލް ލައިސަންސެއް ދޫކުރަމުންދެއެވެ. ނަމަވެސް، 1 ފެބްރުއަރީ 2026 އިން ފެށިގެން މި އުސޫލަށް ބަދަލު ގެނައުމަށް ވަނީ ހަމަޖެހިފައެވެ.

އައު އުސޫލަށް އަމަލުކުރަން ފެށުމުން ގެނެވޭ މައިގަނޑު ބަދަލުތަކުގެ ތެރޭގައި، ކޯސް ނިންމިކަމުގެ ލިޔުމާއެކު ރަޖިސްޓްރީވުމަށް ހުށަހަޅާ ފަރާތްތަކަށް ދޫކުރެވޭނީ ހަމައެކަނި ޕްރޮވިޝަނަލް ރަޖިސްޓްރޭޝަނާއި ޕްރޮވިޝަނަލް ޕްރެކްޓިސިންގ ލައިސަންސެކެވެ. އަދި ދާއިމީ ރަޖިސްޓްރޭޝަން ލިބޭނީ ކޯހުގެ އަސްލު ކޮލިފިކޭޝަން ސެޓްފިކެޓް ހުށަހެޅުމުންނެވެ.

ހަމައެއާއެކު ކޮމްޕިޓެންސީ އިމްތިހާނުން ފާސްވެގެން ލައިސަންސް ހޯދުމަށް ހުށަހަޅާ ނަރުހުންވެސް ކޮލިފިކޭޝަން ސެޓްފިކެޓް ހުށަހަޅަން ޖެހޭނެއެވެ. އަދި ރަޖިސްޓްރީގައި އިތުރު ކޮލިފިކޭޝަނެއް ހިމަނަން އެދޭ ނަރުހުންވެސް، ކުރިއަށް އޮތް ތަނުގައި އެ ކޯހެއްގެ ކޮލިފިކޭޝަން ސެޓްފިކެޓް ހުށަހަޅަން ޖެހޭނެއެވެ.

ނާރސިންގ ކައުންސިލުން މި ބަދަލު ގެންނަން ނިންމީ، ސިއްހީ ހިދުމަތްދޭ ނަރުހުންނަކީ އެކަށީގެންވާ ތައުލީމާއި ތަމްރީނު ލިބިފައިވާ ފަރާތްތަކެއްކަން ކަށަވަރުކުރުމަށާއި، ރަޖިސްޓްރޭޝަން މަރުހަލާގައި ސައްހަ ލިޔެކިޔުންތައް ބޭނުންކުރުން އިތުރުކުރުމުގެ މަގުސަދުގައެވެ. މި ބަދަލާއެކު، 2026 ވަނަ އަހަރުން ފެށިގެން ނަރުހުންގެ ރަޖިސްޓްރޭޝަންގެ ކަންކަން ކުރިއަށްވުރެ ބޮޑަށް ހަރުދަނާވެގެންދާނެ ކަމަށް އެކައުންސިލުން ވަނީ ހާމަކޮށްފައެވެ.