ރާއްޖޭގެ މިނިވަންކަމާއި ސިޔާދަތަށް ނުރައްކާވާ ފަދަ ގޮތަކަށް ހުރި އަސްކަރީ އެއްބަސްވުންތައް އިސްލާހުކޮށް ނިމިފައިވާ ކަމަށް ވިދާޅުވެ، ރައީސް ޑރ. މުހައްމަދު މުއިއްޒު ދިވެހި ރައްޔިތުންނަށް ބޮޑު އޮޅުވައިލުމެއް އޮޅުވައިލައްވާފައިވާކަން ހާމަވެއްޖެއެވެ.

މިކަން ފަޅާއެރީ، އެ އެއްބަސްވުންތަކުގެ މަޝްވަރާތައް އަދިވެސް ދަނީ ކުރިއަށް ކަމަށް ބުނެ ރައީސް އޮފީހުން ފޮނުވި ރަސްމީ ލިޔުމަކުންނެވެ.

މިދިޔަ އަހަރުގެ މެއި މަހުގެ 3 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ރައީސް މުއިއްޒު ވަނީ، ރާއްޖޭގެ މިނިވަންކަމަށް ބުރޫއަރާ ފަދަ އެއްވެސް ކަމެއް މިހާރު އެއްބަސްވުންތަކުގައި "ނޯންނާނެ" ކަމަށް ވިދާޅުވެ، އެކަންކަން އިސްލާހުކޮށް ނިމިފައިވާ ކަމުގެ ޔަގީންކަން ދެއްވާފައެވެ. ނަމަވެސް، މައުލޫމާތު ހޯދައި ލިބިގަތުމުގެ ހައްގުގެ ދަށުން އަމިއްލަ ފަރާތަކުން ހުށަހެޅި ސުވާލުތަކަށް ޖަވާބުދެމުން ރައީސް އޮފީހުން މި މަހުގެ 27 ގައި ބުނެފައިވަނީ، އެ އެއްބަސްވުންތަކާ ގުޅޭ މަޝްވަރާތައް އަދިވެސް ދަނީ ކުރިއަށް ކަމަށެވެ. މިއީ ރައީސްގެ ވާހަކަފުޅާއި ސަރުކާރުގެ ރަސްމީ އިދާރާތަކުގެ ބަހާ ދިމާނުވާ، ރައްޔިތުންނަށް އިތުރުފުޅު ހެއްދެވިކަން ހާމަވާ ބޮޑު ފުށުއެރުމެކެވެ.

ވެރިކަމަށް ވަޑައިގަތުމުގެ ކުރިން ބޭރުގެ އަސްކަރީ އެއްބަސްވުންތައް ހާމަކުރައްވާނެ ކަމަށް ރައީސް މުއިއްޒު ވެވަޑައިގެންނެވި ވައުދަށް ވެސް މިހާރު ވަނީ ބަހަނާ ދައްކަވަން ފަށްޓަވާފައެވެ. ރައީސް އޮފީހުގެ ޖަވާބުގައި ބުނެފައިވަނީ އެއީ ބައިލެޓްރަލް ނުވަތަ ދެ ގައުމެއްގެ ދެމެދުގައިވާ ސިއްރު އެއްބަސްވުންތަކަކަށް ވާތީ، އެ ހާމަކުރުމުގައި ދަތިތަކެއް ހުރި ކަމަށެވެ. މިއީ ވެރިކަމަށް އައުމަށްޓަކައި ދެއްކެވި ވާހަކަފުޅުތަކާއި، ވެރިކަމުގެ ތިންވަނަ އަހަރަށް އެޅިފައިވާއިރު އަމަލުކުރައްވަމުންދާ ގޮތާ ދެމެދު އޮތް ބޮޑު ފަރަގެކެވެ.

ކުރީ ސަރުކާރުން ހަދާފައިވާ އެއްބަސްވުންތަކުގެ ސަބަބުން ރާއްޖޭގެ ސިޔާދަތު ގެއްލޭ ކަމަށް ވިދާޅުވެ، ސިޔާސީ މަންފާ ހޯއްދެވި ނަމަވެސް، މިއަދު އެ އެއްބަސްވުންތަކުގައި "ކަންބޮޑުވާންޖެހޭ ކަމެއް ނެތް" ކަމަށް ވިދާޅުވެ ރައީސް ދައްކަވާ ވާހަކަފުޅުތަކުން ރައްޔިތުންގެ މެދުގައި ވަނީ ބޮޑު ސުވާލެއް އުފެދިފައެވެ. ދެފުށް ފެންނަ ޖަވާބުދާރީވާ ސަރުކާރެއްގެ ސިފަ ގެއްލި، މިނިވަންކަމުގެ ނަމުގައި ރައްޔިތުންނަށް އޮޅުވައިލަމުންދާ ކަމަށް ބުނެ ގިނަ ބައެއްގެ ފާޑުކިޔުން މިހާރު ވަނީ ސަރުކާރަށް އަމާޒުވެފައެވެ.