އަށްހާހަށްވުރެ ގިނަ ދަރިވަރުންނާއެކު 2025 ވަނަ އަހަރުގެ ސެކަންޑަރީ ސްކޫލް ސެޓްފިކެޓް (އެސްއެސްސީ) އަދި އޯލެވެލް އިމްތިހާން މިއަދު ރަސްމީކޮށް ފަށައިފިއެވެ.

މިއަދު ހެނދުނު 9:30 ގައި ފެށި މި އިމްތިހާނުތައް ކުރިއަށްދާނީ މިއަދުން ފެށިގެން އަންނަ މާރިޗް މަހުގެ ހަ ވަނަ ދުވަހުގެ ނިޔަލަށެވެ. މިއަހަރުގެ އިމްތިހާން ފަށާފައިވަނީ އެސްއެސްސީ އިމްތިހާނުގެ ދިވެހި މާއްދާގެ ފުރަތަމަ ކަރުދާހުންނެވެ.

މި އިމްތިހާނާ ގުޅޭގޮތުން ތައުލީމާ ބެހޭ ވުޒާރާއިން ބުނީ، މިއަހަރުގެ އިމްތިހާނުގައި ޖުމްލަ 8،216 ދަރިވަރުން ބައިވެރިވާ ކަމަށެވެ. މި އިމްތިހާންތައް ކުރިއަށްދަނީ މާލޭގެ 21 ސެންޓަރަކާއި، އަތޮޅުތެރޭގެ 246 ސެންޓަރެއް ހިމެނޭ ގޮތަށް ޖުމްލަ 267 ސެންޓަރުގައެވެ.

މިއަދު ފެށުނު އިމްތިހާނަކީ ނިމިދިޔަ ދިރާސީ އަހަރު ގްރޭޑް 10 ނިންމި ދަރިވަރުންނަށް ބާއްވާ އިމްތިހާނެކެވެ. މިހާރު ގްރޭޑް 10 އެއްގައި ކިޔަވަމުންދާ ދަރިވަރުންގެ އޯލެވެލް އިމްތިހާން އޮންނާނީ މިއަހަރުގެ އޮކްޓޫބަރު ނުވަތަ ނޮވެމްބަރު މަހުގެ ތެރޭގައެވެ.

ސަރުކާރުގެ ތައުލީމީ ސިޔާސަތަށް ގެނެވުނު ބަދަލާއެކު، މިއަހަރުން ފެށިގެން އޯލެވެލް އިމްތިހާންތައް ދެން ބާއްވަމުންދާނީ ކޮންމެ އަހަރެއްގެ ވެސް އޮކްޓޫބަރު/ނޮވެމްބަރު މަހުގެ ތެރޭގައެވެ. މިއީ ރާއްޖޭގެ ތައުލީމީ ކަލަންޑަރު ކުރިން އޮތް ގޮތަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައިވާ ނިންމެވުމާ އެއްގޮތަށް ގެނެސްފައިވާ ބަދަލެކެވެ.