ލޯކަލް ކައުންސިލް އިންތިޚާބުގެ އެމްޑީޕީ ކެމްޕޭން ފެށުމަށް ބޭއްވި ޖަލްސާގައި، ރާއްޖޭގެ ބޮޑެތި ސިޓީތަކުގެ މޭޔަރުން ވަނީ މިހާރުގެ ސަރުކާރަށް ބޮޑެތި ފާޑުކިޔުންތަކެއް އަމާޒުކުރައްވާފައެވެ.

މާލެ، އައްޑޫ، ތިނަދޫ، ފުވައްމުލަކު އަދި ކުޅުދުއްފުށީ ސިޓީގެ މޭޔަރުން ފާހަގަކުރެއްވި ގޮތުގައި، މި ސަރުކާރުން މަސައްކަތް ކުރަމުންދަނީ ލާމަރުކަޒީ ނިޒާމުގެ ބާރުތައް ކަނޑުވާލައި، ހުރިހާ ބާރެއް އަލުން މަރުކަޒީ ސަރުކާރުގެ ދަށަށް ގެންދިއުމަށެވެ. މޭޔަރުން ވިދާޅުވި ގޮތުގައި ކައުންސިލްތަކުގެ ބާރުތައް ހަނިކުރުމަށްޓަކައި ގާނޫނަށް އިސްލާހުތައް ގެންނަމުންދަނީ އެއްވެސް މަޝްވަރާއެއް ނެތި، ނިޒާމު ބަލިކަށި ކުރުމުގެ ނިޔަތުގައެވެ.

އައްޑޫ ސިޓީގެ މޭޔަރު އަލީ ނިޒާރު ވިދާޅުވީ، ސަރުކާރުން މިހާތަނަށް ލާމަރުކަޒީ ގާނޫނަށް ގެނައި ކޮންމެ ބަދަލަކީ ކައުންސިލްތަކުގެ އަތުން ބާރުތައް "ދަމައިގަތުމަށް" ކުރި މަސައްކަތެއް ކަމަށެވެ. އަދި ތިނަދޫ މޭޔަރު ސައުދު އަލީ ވަނީ ސަރުކާރުން ބިރުދެއްކުމުގެ ސަގާފަތެއް އުފައްދައި، ވަޒީފާތަކުން މީހުން ވަކިކުރަމުންދާ ކަމަށް ތުހުމަތު ކުރައްވާފައެވެ. މޭޔަރުންގެ މައިގަނޑު ކަންބޮޑުވުމަކީ، ރަށްރަށުގެ ތަރައްގީއާއި ގުޅުންހުރި ނިންމުންތައް މާލޭގައި ތިބެގެން ނިންމުމަށް ސަރުކާރުން ކުރާ މަސައްކަތެވެ.

ފުވައްމުލަކު މޭޔަރު އިސްމާއީލް ރަފީގާއި ކުޅުދުއްފުށީ މޭޔަރު މުހައްމަދު އާތިފް ފާހަގަކުރެއްވި ގޮތުގައި، ލާމަރުކަޒީ ނިޒާމުގެ ތެރެއިން ރައްޔިތުންނަށް ލިބުނު މާލީ ބާރުވެރިކަމާއި ބިމުގެ ބާރުވެރިކަން މިހާރު ދަނީ ގެއްލެމުންނެވެ. ވަކި ސަރަހައްދަކަށް އާބާދީ ޖަމާކުރުމުގެ ސިޔާސަތުތަކުގެ ސަބަބުން ރަށްރަށުގެ ތަރައްގީއަށް ހުރަސް އެޅޭނެ ކަމަށްވެސް އެ ބޭފުޅުން ވިދާޅުވިއެވެ. މި ޖަލްސާގައި މޭޔަރުން ވަނީ، މަރުކަޒީ "މުސީބާތުން" ސަލާމަތްވުމަށް އޮތް ހަމައެކަނި މަގަކީ އެމްޑީޕީއަށް ވޯޓު ދިނުން ކަމަށް ބުނެ، ކުރިއަށް އޮތް ކައުންސިލް އިންތިޚާބުގައި ސަރުކާރަށް ނޫނެކޭ ބުނުމަށް ރައްޔިތުންނަށް ގޮވާލައްވާފައެވެ.

މާލެ ސިޓީ ގެ މޭޔަރު އާދަމް އާޒިމް ވިދާޅުވީ ސަރުކާރަށް ބަރޯސާވާ ކައުންސިލެއް އިންތިހާބުކުރުމުގެ ބޭނުމެއް ނެތް ކަމަށާއި، އެމްޑީޕީގެ ސަރުކާރުގައި ލާމަރުކަޒީ އުސޫލުން މިނިވަންކަމާއެކު ކައުންސިލްތައް ހިންގޭނެކަން ސާބިތުކޮށްދީފައިވާނެ ކަމަށެވެ.