މެދުއިރުމަތީގެ މަސްރަޙަށް އައި ބަދަލުތަކާ ގުޅިގެން ގަލްފް ގައުމުތަކުގެ ވައިގެ ސަރަހައްދު ބަންދުކުރުމުގެ ސަބަބުން، ރާއްޖެއިން ފުރަން އުޅުނު ފަތުރުވެރިންނަށް ދިމާވި ދަތިތަކަށް ހައްލެއް ހޯދައިދިނުމުގެ ގޮތުން އެފަރާތްތަކުގެ ވިސާ އިތުރުކޮށްދިނުމަށް މޯލްޑިވްސް އިމިގްރޭޝަނުން ނިންމައިފިއެވެ.

އިމިގްރޭޝަނުން ހާމަކުރި ގޮތުގައި، މިމަހުގެ 28 ވަނަ ދުވަހުން ފެށިގެން މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން ދަތުރުފަތުރުގެ ނިޒާމަށް ވަނީ ބޮޑެތި ބުރޫތަކެއް އަރާފައެވެ.

މި ހަމަނުޖެހުންތަކާ ގުޅިގެން ގިނަ އަދަދެއްގެ ފްލައިޓްތައް ކެންސަލްވުމުން، ރާއްޖޭގައި ތިބި ބައެއް ފަ

ތުރުވެރިންނަށް އެމީހުންގެ ވިސާ ހަމަވުމުގެ ކުރިން ފުރޭނެ ގޮތެއް މިވަގުތު ނެތެވެ. އެހެންކަމުން، އެފަދަ ފަތުރުވެރިންނަށް ލުޔެއް ދިނުމުގެ ގޮތުން ޓޫރިސްޓް ވިސާ އިތުރުކޮށްދިނުމަށް އިމިގްރޭޝަނުން މިހާރު ވަނީ ނިންމާފައެވެ.

މި މައްސަލަ އުފެދެން މެދުވެރިވީ އެމެރިކާ އާއި އިސްރާއީލުން އިސްވެ އީރާނަށް ދިން ހަމަލާތަކާ ގުޅިގެން މަސްރަޙު ގޯސްވުމުންނެވެ. މި ހަމަލާތަކުގެ ރައްދުގައި އީރާނުން ވަނީ އެމެރިކާގެ އަސްކަރީ ބޭސްތަކަށް ހަމަލާދީފައެވެ. މި ނުރައްކާތެރި ހާލަތާ ގުޅިގެން ޤަޠަރާއި ދުބާއީ ފަދަ ޤައުމުތަކުން ވަނީ އެ ޤައުމުތަކުގެ ވައިގެ ސަރަހައްދު ބަންދުކޮށް، ދަތުރުތައް މެދުކަނޑާލާފައެވެ. ސައުދީ އަރަބިއްޔާ ފިޔަވައި މެދުއިރުމަތީގެ ގިނަ ވައިގެ މަގުތަކެއް ބަންދުވުމާއެކު، އެ ސަރަހައްދުން ދަތުރުކުރާ ހުރިހާ ފްލައިޓްތަކެއް ކަހަލަ ގޮތަކަށް ވަނީ ހުއްޓުމަކަށް އައިސްފައެވެ.

ރާއްޖެއަށް ޒިޔާރަތްކުރާ ފަތުރުވެރިންގެ ބޮޑު އިންސައްތައަކީ މެދުއިރުމަތީގެ މަގުތަކުން ދަތުރުކުރާ ފަރާތްތަކަށް ވުމުން، މި ހާލަތުގެ ސަބަބުން ރާއްޖޭގައި ނުފުރިފައި ތިބި ފަތުރުވެރިންގެ އަދަދު ވަނީ ވަރަށް ބޮޑަށް އިތުރުވެފައެވެ.