މި ރަމަޟާން މަހުގެ ފުރަތަމަ ހަފުތާގެ ތެރޭގައި ފިޠުރު ޒަކާތުގެ ގޮތުގައި 1.3 މިލިޔަނަށްވުރެ ގިނަ ރުފިޔާ ލިބިފައިވާކަމަށް މޯލްޑިވްސް ޒަކާތު ހައުސްއިން ހާމަކޮށްފިއެވެ.

ޒަކާތު ހައުސްއިން މިއަދު ބުނީ ރަމަޟާން މަހުގެ ފުރަތަމަ 7 ދުވަހުގެ ތެރޭގައި ފިޠުރު ޒަކާތުގެ ގޮތުގައި ޖުމްލަ 1،374،481 (އެއް މިލިޔަން ތިން ލައްކަ ހަތްދިހަ ހަތަރު ހާސް ހަތަރު ސަތޭކަ އަށްޑިހަ އެއް) ރުފިޔާ ލިބިފައިވާ ކަމަށެވެ.

މި އަހަރުގެ ރަމަޟާން މަހުގެ ފުރަތަމަ ދުވަހުން ފެށިގެން ޒަކާތު ހައުސްއިން ވަނީ އޮންލައިންކޮށް ފިޠުރު ޒަކާތް ބަލައިގަންނަން ފަށާފައެވެ. އެގޮތުން ޖުމްލަ 7 އޮންލައިން ޕްލެޓްފޯމެއް މެދުވެރިކޮށް ޒަކާތް ދެއްކޭނެ އިންތިޒާމު ވަނީ ހަމަޖައްސާފައެވެ.

އޮންލައިންކޮށް ޒަކާތް ދެއްކޭނެ ޕްލެޓްފޯމްތަކަކީ؛ ދިރާގު މޯބައިލް އެޕް އަދި ދިރާގު ޕޭ ވެބްސައިޓް، އުރީދޫ އެމް-ފައިސާ މޯބައިލް އެޕް، މޯލްޑިވްސް އިސްލާމިކް ބޭންކް (އެމް.އައި.ބީ) މޯބައިލް އެޕް، ބޭންކް އޮފް މޯލްޑިވްސް (ބީ.އެމް.އެލް) މޯބައިލް އެޕް، ފަހިޕޭ މޯބައިލް އެޕް، އަވަސް މޯބައިލް އެޕް އަދި ބަނޑޭރި ޕޭ ވެބްސައިޓެވެ.

ޒަކާތު ހައުސްއިން މަޢުލޫމާތު ދޭ ގޮތުގައި، މީގެ ތެރެއިން ބަނޑޭރި ޕޭ އަދި ފަހިޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ވެސް ޒަކާތް ދެއްކޭނެއެވެ. ނަމަވެސް އެހެނިހެން ޕްލެޓްފޯމުތައް މެދުވެރިކޮށް ޒަކާތް ދެއްކޭނީ ރަމަޟާން މަހުގެ 27 ވަނަ ދުވަހުގެ ހެނދުނު 06:00 އާ ހަމައަށެވެ.

މި އަހަރު ފިޠުރު ޒަކާތުގެ ގޮތުގައި ދައްކަންޖެހޭ ފައިސާގެ މިންވަރު ކަނޑައަޅާފައިވަނީ އެ ބަޔަކު އާންމުކޮށް ކައިއުޅޭ ގޮލުގެ ބާވަތުން 2.4 ކިލޯގެ އަގަށެވެ. އެގޮތުން ކަނޑައަޅާފައިވާ އަގުތަކަކީ، އާދައިގެ ހަނޑޫނަމަ 12 ރުފިޔާ، ތައިލެންޑް ހުދު ހަނޑޫ ކަމުގައިވާނަމަ 53 ރުފިޔާ، ރަތް ހަނޑޫނަމަ 96 ރުފިޔާ، ބާސްމަތީ ހަނޑޫ (އާދައިގެ) ނަމަ 77 ރުފިޔާ، ބާސްމަތީ ހަނޑޫ (މޮޅު) 109 ރުފިޔާ، ބާސްމަތީ ހަނޑޫ (އެންމެ މޮޅު) 136 ރުފިޔާ، އާދައިގެ ފުށް 10 ރުފިޔާ އަދި އާޓާ ފުށް 75 ރުފިޔާ އެވެ.

ފިޠުރު ޒަކާތަކީ ކޮންމެ މުސްލިމެއްގެ މައްޗަށް ރަމަޟާން މަސް ނިމުމުގެ ކުރިން އަދާކުރުން ވާޖިބު ކުރައްވާފައިވާ އަޅުކަމެކެވެ.