އިރާނަށް ހަމަލާދީ އެމެރިކާ އާއި އިޒްރޭލުން ހިންގަމުން ދަނީ ފިނޑި އަމަލުތަކެއް ކަމަށް ކުރީގެ ރައީސް އަލްއުސްތާޒް މައުމޫން އަބްދުލްގައްޔޫމް ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ މައުމޫން ފައުންޑޭޝަންގެ އިހްޔާ ޕްރޮގްރާމުގެ ދެވަނަ ޖަލްސާގައި ވާހަކަފުޅު ދައްކަވަމުންނެވެ.

މައުމޫން ވިދާޅުވީ، އެމެރިކާ އާއި އިޒްރޭލުން ގުޅިގެން އިރާނަށް ދިން ހަމަލާތަކުގައި އެ ގައުމުގެ ރޫހާނީ ލީޑަރު، އާޔަތުﷲ ޚާމަނާއީ އަވަހާރަކޮށްލުމަކީ މުޅި އިސްލާމީ އުންމަތަށް ލިބުނު ބޮޑު ހިތާމައެއް ކަމަށެވެ. މައުމޫން ވިދާޅުވީ އެމަނިކުފާނު އަވަހާރަކޮށްލީ އޮފީސްކޮޅުގައި މަސައްކަތްޕުޅުގައި އިންނަވަނިކޮށް ބޮން އަޅައިގެން ކަމަށް ފާހަގަކުރައްވަމުން، މިއީ އަނިޔާވެރިކަމުގެ އިންތިހާ ކަމަށާއި މިފަދަ އަމަލުތަކާ ދެކޮޅަށް މުސްލިމުން ތެދުވަންޖެހޭނެ ކަމަށެވެ.

ހަނގުރާމައިގެ އުސޫލުތަކާ ހިލާފަށް ހިންގާ މިފަދަ ކަންކަމަށް ފާޑުވިދާޅުވަމުން މައުމޫން ވިދާޅުވީ، ބޮޑެތި ގައުމުތަކުގެ ވެރިން ރައްކާތެރި ތަންތާގައި ތިބެގެން ނުރައްކާތެރި ހަތިޔާރު ބޭނުންކޮށްގެން މީހުން ނިދާފައި ތިއްބާ ނުވަތަ މަސައްކަތުގައި ތިއްބާ މެރުމަކީ އެއްވެސް އުސޫލެއް ނެތް ފިނޑި އަމަލުތަކެއް ކަމަށެވެ. އަދި ހަނގުރާމައެއް ކުރަން ޖެހުނު ކަމުގައި ވިޔަސް، އެކަން ކުރަންޖެހޭނީ ހަމަތަކާއި އުސޫލުތަކުގެ ތެރެއިން ކަމަށާއި، ބޭނުންހާ ގޮތަކަށް މީހުން މަރައި ތަންތަން ސުންނާފަތި ކުރުމަކީ ބަލައިގަނެވޭނެ ކަމެއް ނޫން ކަމަށްވެސް އެމަނިކުފާނު ވިދާޅުވި އެވެ.

މި ހަމަލާތަކާ ގުޅިގެން މަސްރަހު އިތުރަށް ހޫނުވެފައިވާއިރު، އިރާނުން އަންނަނީ އިޒްރޭލަށާއި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ރައްދު ހަމަލާ ދެމުންނެވެ.