ވޭތުވެދިޔަ ސަރުކާރުން މާލޭ ޖަލު އުވާލުމާ ގުޅިގެން މިނިވަންވި ގައިދީން އަނބުރާ ބަންދަށް ގެނައުމަށްޓަކައި، ކުރިއަށް އޮތް ދެ އަހަރު ދުވަހުގެ ތެރޭގައި ޖަލުތަކުގެ ޖާގަ 400 އަށް އިތުރުކުރުމުގެ މަސައްކަތް ކުރަމުންދާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.

ވަޒީރު ފާހަގަކުރެއްވި ގޮތުގައި، ކުރީ ސަރުކާރުން ވަނީ ރާއްޖޭގައި ހުރި އެންމެ ފެންވަރު ރަނގަޅު ވަސީލަތްތަކާއެކު ހިންގަމުންދިޔަ 350 މީހުންގެ ޖާގަ ހިމެނޭ މާލޭ ޖަލާއި، 100 މީހުންގެ ޖާގަ ހިމެނޭ ކަސްޓޯޑިއަލް ފެސިލިޓީ މުޅިން އުވާލާފައެވެ. މީގެ ސަބަބުން 450 މީހުންގެ ޖާގަ ގެއްލި، ގިނަ އަދަދެއްގެ ގައިދީން މުޖުތަމައުގެ ތެރެއަށް ދޫވެފައިވާ ކަމަށް އެމަނިކުފާނު ވިދާޅުވިއެވެ.

ޖަލުތަކުގެ ޖާގަ އިތުރުކުރުމަށް ކުރަމުންދާ މަސައްކަތުގެ ދަށުން، ހުޅުމާލެ ޖަލުގައި މިހާރު ވަނީ 100 މީހުންގެ އާ ޖާގައެއް ތައްޔާރުކޮށް ނިންމާފައެވެ.

ވަޒީރު ވިދާޅުވި ގޮތުގައި، ކުރީ ސަރުކާރުން 39 މިލިއަން ރުފިޔާ ހޭދަކޮށްގެންވެސް ނުނިމި އޮތް މި މަސައްކަތް، މި ސަރުކާރުން ނިންމާލީ އެންމެ 5 މިލިއަން ރުފިޔާގެ ބަޖެޓަކުން، ކަރެކްޝަނަލް ސާވިސްގެ މުވައްޒަފުންގެ އަމަލީ އެހީތެރިކަމާއެކުގައެވެ. މިއީ ދޫވެފައި ތިބި ގައިދީން އަނބުރާ ޖަލަށް ގެނައުމަށް ކުރެވޭ މަސައްކަތަށް ލިބުނު ބޮޑު ކާމިޔާބީއެއްގެ ގޮތުގައި ވަޒީރު ސިފަކުރެއްވިއެވެ.

ޖަލުތަކުގެ ސެކިއުރިޓީ ވަރުގަދަކުރުމަށްޓަކައި މާފުށީ ޖަލުގައި އަލަށް ބޮޑީ ސްކޭނަރުތައް ބަހައްޓާފައިވާކަންވެސް ވަޒީރު ހާމަކުރެއްވިއެވެ. މި ސްކޭނަރުތަކުގެ އެހީގައި ޖަލަށް ވަންނަ ކޮންމެ މީހަކު، އާއިލާގެ މީހެއް ނުވަތަ މުވައްޒަފެއް ނަމަވެސް ސްކޭން ކުރެވޭނެ ކަމަށާއި، މީގެ ސަބަބުން ޖަލަށް ފޯނާއި މަސްތުވާތަކެތި ވެއްދުން ހުއްޓުވި، ސްކޭމް ކޯލްތަކުގެ މައްސަލައަށް ދާއިމީ ހައްލެއް ލިބޭނެ ކަމަށް ވިދާޅުވިއެވެ. މީގެ އިތުރުން، ޖަލުގެ ޚިދުމަތްތައް ލުއިފަސޭހަކުރުމަށްޓަކައި އޮންލައިން ޕޯޓަލްއެއްގެ ޚިދުމަތްވެސް މިހާރު ވަނީ ތައާރަފްކޮށްފައެވެ.

އަތޮޅުތެރޭގެ ސަލާމަތީ ކަންކަން ހަރުދަނާކުރުމަށް ފުލުހުންގެ ޚިދުމަތް ފުޅާކުރުމުގެ މަސައްކަތްވެސް ބާރުމިނުގައި ކުރިއަށްދާކަން ވަޒީރު ފާހަގަކުރެއްވިއެވެ. އެގޮތުން ރާއްޖޭގެ އެކި ހިސާބުތަކުގައި 53 ޕޮލިސް ޕޯސްޓާއި ސްޓޭޝަން އިމާރާތް ކުރުމުގެ މަސައްކަތް ހިނގަމުންދާއިރު، މި މަސް ނިމުމުގެ ކުރިން އިތުރު 11 ތަނެއްގެ މަސައްކަތް ނިމި ޚިދުމަތަށް ގެނެވޭނެ ކަމަށް ވަޒީރު ވިދާޅުވިއެވެ. މީގެ ތެރެއިން ދެ އިމާރާތެއްގެ މަސައްކަތް މިހާރުވެސް ނިމި ޚިދުމަތް ދޭން ފަށާފައިވާކަން ވަޒީރު ފާހަގަކުރެއްވިއެވެ.