މާފުށީ ޖަލުގައި އަލަށް ބެހެއްޓި ބޮޑީ ސްކޭން މެޝިނުގެ އެހީގައި، ޖަލަށް މަނާ ތަކެތި އެތެރެކުރުން ހުއްޓުވައި، ޖަލުތަކުން ހިންގާ ސްކޭމް މައްސަލަތަކަށް ހައްލެއް ލިބިގެންދާނެ ކަމަށް ހޯމް މިނިސްޓަރ ޢަލީ އިހުސާން ވިދާޅުވެއްޖެއެވެ.

މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރ އިހުސާން ވިދާޅުވީ، މި ސަރުކާރުން ވެރިކަމާ ހަވާލުވިއިރު ދިވެހި ރައްޔިތުންނަށް ކުރިމަތިވެފައި އޮތް އެންމެ ބޮޑު އެއް ގޮންޖެހުމަކީ ޖަލުގައި ތިބޭ ގައިދީން ފޯނު ބޭނުންކޮށްގެން ހިންގާ ސްކޭމްތަކުގެ މައްސަލަ ކަމަށެވެ. މިކަން ހުއްޓުވުމަށްޓަކައި ސަރުކާރުން ހާއްސަ އިސްކަމެއް ދީގެން ގިނަ މަސައްކަތްތަކެއް ފަށާފައިވާކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވި ގޮތުގައި، ޖަލުތަކުގެ ސެކިއުރިޓީ ވަރުގަދަކުރުމުގެ ގޮތުން ބައިނަލްއަގުވާމީ މިންގަނޑުތަކަށް ފެތޭ "ސެންޓްރަލް ޕްރިޒަން ކޮމްޕްލެކްސް" އެއް ބިނާކުރުމުގެ މަސައްކަތް ދަނީ ކުރެވެމުންނެވެ. ނަމަވެސް، އެ މަސައްކަތް ނިމެންދެން މަޑުނުކޮށް، މިހާރު ހުރި ޖަލުތަކުގެ ސެކިއުރިޓީ ބްރީޗްތައް ހައްލުކުރުމަށް އަޅަމުންދާ ފިޔަވަޅުތަކުގެ ތެރެއިން މިމަހު މާފުށީ ޖަލުގައި ބޮޑީ ސްކޭން މެޝިނެއް ބަހައްޓައި މިހާރު ވަނީ ބޭނުންކުރަން ފަށާފައެވެ.

"މި މަހު ވަނީ ބޮޑީ ސްކޭނިން އިންސްޓޯލް ކުރެވިފައި، މާފުށީ ޖަލަށް ވަދެ ނިކުމެ ހަދާ ގައިދީންނާއި، ގައިދީންނާ ބައްދަލުކުރުމަށް ދާ އާއިލާގެ ފަރާތްތަކާއި، އަދި ޖަލު ބަލަހައްޓާ އޮފިސަރުން ވެސް ހިމެނޭހެން 100 ޕަސެންޓް ސްކޭން ކުރެވޭނެ، ހަށިގަނޑުގެ ކޮންމެ ތާކު ކޮންމެ އެއްޗެއް ފޮރުވާފައި އޮތަސް އެ ފެންނަ ގޮތަށް މިހާރު ވަނީ މި ހިދުމަތް ތައާރަފުކުރެވިފައި" މި މެޝިނުގެ ސަބަބުން ޖަލަށް ވަދެ ނިކުމެވާ އެންމެހާ ފަރާތްތަކުގެ ސެކިއުރިޓީ ކަށަވަރު ކުރެވޭނެކަން ފާހަގަކުރައްވައި މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ، މި އައު ނިޒާމުގެ ސަބަބުން ޖަލަށް ފޯނާއި އެހެނިހެން މަނާ ތަކެތި އެތެރެކުރުން ހުއްޓުވުމަށް ބޮޑު ބާރަކަށް ވެގެންދާނެ ކަމަށެވެ. އަދި މީގެ ސަބަބުން މާފުށީ ޖަލުގައި ތިބެގެން ގައިދީން ހިންގަމުން އައި ސްކޭމް ފޯންކޯލްތަކުގެ މައްސަލައަށް ވަރަށް ބޮޑު ހައްލެއް ލިބިގެންދާނެ ކަމުގެ ޔަގީންކަން މިނިސްޓަރ ދެއްވިއެވެ.