ތެލުގެ އަގާ މެދު ކަންބޮޑުވާން ނުޖެހޭ ކަމަށާއި، އަގު ބޮޑުވާނެ ކަމުގެ އެއްވެސް އިޝާރާތެއް ނެތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވިތާ އެންމެ ދެ ދުވަސް ތެރޭގައި، ރާއްޖޭގެ ބާޒާރުގައި ތެލުގެ އަގު ރެކޯޑު މިންވަރަކަށް ބޮޑުކުރުމާ ގުޅިގެން ސަރުކާރަށް ބޮޑެތި ފާޑުކިޔުންތަކެއް އަމާޒުވާން ފަށައިފިއެވެ.

ރައީސް މުއިއްޒު ދާދި ފަހުން ވިދާޅުވެފައިވަނީ ތެލުގެ އިންތިޒާމުތައް ރަނގަޅަށް ހަމަޖެހިފައިވާ ކަމަށާއި، ކުރިއަށް އޮތް ތަނުގައިވެސް ދަތިކަމެއް ކުރިމަތިވެދާނެ ކަމުގެ ބިރެއް ނެތް ކަމަށެވެ. ނަމަވެސް އެ މަނިކުފާނުގެ މި ވާހަކަފުޅާ މުޅިން ޚިލާފަށް، އެސްޓީއޯ އިން މިވަނީ ޕެޓްރޯލް ލީޓަރަކުން 18.6 އިންސައްތަ އަދި ޑީސަލް ލީޓަރަކުން 26 އިންސައްތަ ބޮޑުކޮށްފައެވެ.

މި ކުއްލި ބަދަލާއެކު ޕެޓްރޯލް ލީޓަރެއްގެ އަގު 16.01 ރުފިޔާއަށް އުފުލިފައިވާއިރު، ޑީސަލް ލީޓަރެއްގެ އަގު ވަނީ 17.54 ރުފިޔާއަށް އަރާފައެވެ. މިއީ ފަހުގެ ތާރީޚެއްގައި ތެލުގެ އަގަށް މިހާ ބޮޑު ބަދަލެއް އައި ފުރަތަމަ ފަހަރެވެ.

އެސްޓީއޯގެ އިތުރުން އަމިއްލަ ކުންފުންޏެއް ކަމަށްވާ ހޯކްސް އިން ވެސް ވަނީ މި ރޭޓުން ތެލުގެ އަގު ބޮޑުކޮށްފައެވެ. މި ބަދަލު ގެނައީ ދުނިޔޭގެ ބާޒާރުގައި ތެޔޮ ފީފާއެއްގެ އަގު 81 ޑޮލަރަށް އުފުލުމާ ގުޅިގެން ކަމަށް ބުނި ނަމަވެސް، އާންމުންގެ އެންމެ ބޮޑު ޝަކުވާއަކީ ސަރުކާރުގެ ބަހާއި އަމަލު ދިމާނުވުމެވެ.

ގައުމުގެ އެންމެ މަތީ ވެރިޔާ ތެލުގެ އަގު ބޮޑުނުވާނެ ކަމުގެ ފުރިހަމަ ޔަގީންކަން ދެއްވާފައި ވަނިކޮށް، 48 ގަޑިއިރުވެސް ނުވަނީސް ރައްޔިތުންގެ ޖީބަށް ބުރަވާ ގޮތަށް މިފަދަ ނިންމުމެއް ނިންމުމަކީ ސަރުކާރުގެ އިޚުލާސްތެރިކަމާ މެދު ސުވާލު އުފެދޭ ކަމެއް ކަމަށް އިދިކޮޅު ފަރާތްތަކުންނާއި އާންމުން ދަނީ ބުނަމުންނެވެ.

ޚާއްޞަކޮށް، ދުނިޔޭގެ މަސްރަޙުގައި ހިނގަމުންދާ ހަނގުރާމަތަކުގެ ސަބަބުން ތެލުގެ އަގަށް އަތުވެދާނެ ބަދަލެއް ސަރުކާރަށް ކުރިން އަންދާޒާ ކުރެވެން ޖެހޭނެ ކަމަށާއި، ރައީސްގެ ޔަގީންކަމާ އެކު މި ފެނުނު "ސަޕްރައިޒް" އަކީ ރައްޔިތުންނަށް އޮޅުވާލުން ކަމަށް ގިނަ ބަޔަކު ސިފަކުރެއެވެ.