ހޯމް މިނިސްޓަރު އަލީ އިހުސާންގެ އަނބިކަނބަލުންނާއި ދަރިފުޅުގެ ވީޑިއޯއެއް ނެގި މައްސަލާގައި ދައުވާކުރެވޭ މިންވަރަށް ހެކި ހުރި ނަމަވެސް، ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދުގެ މައްޗަށް ދައުވާ ކުރުމުގެ ވިސްނުން ނެތްކަމަށް މިނިސްޓަރު އިހްސާން ވިދާޅުވެއްޖެއެވެ.

މިދިޔަ މަހުގެ 27 ވަނަ ދުވަހު މީސްމީޑިއާގައި ޙިއްސާ ކުރެއްވި މެސެޖެއްގައި މިނިސްޓަރު އިހްސާން ވިދާޅުވީ، އޭނާގެ އަނބިކަނބަލުންނާއި 10 އަހަރުގެ އަންހެން ދަރިފުޅު މަގުމަތިން ދަނިކޮށް އަކުރަމާއި އިބްރާހިމް ވަހީދު ވީޑިއޯކޮށް، ވަކި މީހެއް ނޭނގޭ ސޯޝަލް މީޑިއާ އެކައުންޓަކުން އެ ވީޑިއޯ އާންމުކޮށްފައިވާ ކަމަށެވެ. މި މައްސަލައާ ގުޅިގެން އިހްސާން ވަނީ އަކުރަމާއި ވަހީދު މަގުމަތީގައި ތިބެ ފޯނުން ވީޑިއޯ ކުރާ މަންޒަރު ފެންނަ ސީސީޓީވީ ފޫޓޭޖެއްވެސް އާންމުކުރައްވާފައެވެ. އެ ފޫޓޭޖުން ފެންނަ ގޮތުގައި ވީޑިއޯ ކުރަނީ އިބްރާހިމް ވަހީދެވެ. އޭނާ އެ ވީޑިއޯ ކުރީ އަކުރަމް އޭނާގެ އަތަށް ދިން ފޯނަކުންނެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އިހުސާން ވިދާޅުވީ، މިކަން މައްސަލައަކަށްވީ އޭނާގެ 10 އަހަރުގެ ދަރިފުޅުގެ ވީޑިއޯ ނެގުމުން ކަމަށެވެ. އަދި އެބޭފުޅުން މި ވީޑިއޯ ނަގާފައިވަނީ އިހުސާން ދިރިއުޅޭ ގޭގެ ކުރިމަތީގައި ހުރި ކެމެރާއެއްގެ ދަށުގައި ހުރެގެން ކަމަށާއި، އެ ކެމެރާ ހުރިކަން އެބޭފުޅުންނަށް އެނގިވަޑައިނުގަތީ ކަމަށްވެސް މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވި ގޮތުގައި އެ ދެ ބޭފުޅުން ވީޑިއޯ ނެގީ އޭނާގެ ދަރިފުޅު ވެގެން ނޫން ކަމަށާއި، އެއީ އޭނާ ހޯމް މިނިސްޓަރުގެ މަގާމުގައި ހުންނަވާތީ ދައުލަތުން ދޭ ސެކިއުރިޓީ އާއިލާއަށްވެސް ފޯރުކޮށްދޭތީ އެކަމާ ކަންބޮޑުވެގެން ކުރި ކަމެއް ކަމަށެވެ. ނަމަވެސް އެކަން ސާފުކުރަން ކަމާގުޅޭ އިދާރާތަކާ ސުވާލުކުރުމުގެ ބަދަލުގައި، ކުޑަކުދިންނަށް ފުރައްސާރަކުރުމަކީ ޒިންމާދާރުކަމެއް ނޫން ކަމަށް މިނިސްޓަރު ވިދާޅުވިއެވެ.

"މިދެ ބޭފުޅުންނަކީ ކުރީގެ ދައުލަތުގެ ވެރިން. ބޮޑެތި ކުންފުނިތަކުގެ އެމްޑީކަން ކުރައްވާފައި ތިއްބެވީ. ދައުލަތުގެ މިނިސްޓްރީތަކުގެ ސްޓޭޓް މިނިސްޓަރުކަން ކުރައްވާފައި. މިއަށްވުރެ ޒިންމާދާރުވާންޖެހޭނެ." އިހުސާން ވިދާޅުވިއެވެ.

This evening in Male’, @MDPSecretariat Deputy Chairperson Ibrahim Waheed and Upper North Province President Akram Kamaaluddin recorded video of my wife and our 10-year-old daughter on the street. The footage was later posted via the anonymous account.
These self-proclaimed… pic.twitter.com/m8VWDWTu7o

— Minister of Homeland Security & Technology (@min_mohst) February 26, 2026

އޭގެ އިތުރުން އިޙްސާން ވިދާޅުވީ ކުށެއް ކުރެވުމުން މައާފަށް އެދުމަކީ އެންމެ ރަނގަޅު ގޮތް ކަމަށާއި، އަބުރުގެ ދައުވާ ކުރި ނަމަވެސް ޖަވާބުދާރީވާން ތައްޔާރަށް ހުންނެވި ކަމަށެވެ.

މި މައްސަލާގައި ދައުވާކުރެވޭނެ ވަރަށް ގޭގެ ދެ ކެމެރާއިން ހެކި ލިބިފައި ހުރި ނަމަވެސް، މިހާތަނަށް އެއްވެސް ބަދަލެއް ހޯދަން ކޯޓަށް ދާން ނުވަތަ ޖިނާއީ ތަހުގީގެއް ހިންގަން އެދިފައިނުވާނެ ކަމަށް މިނިސްޓަރު ވިދާޅުވިއެވެ. އެހެންނަމަވެސް، އެފަދަ ހާލަތަކަށް ކަންކަން ގޮސްފިނަމަ އެ ފިޔަވަޅުވެސް އަޅުއްވާނެ ކަމުގެ އިންޒާރު މިނިސްޓަރު އިހުސާން މިއަދު ވަނީ ދެއްވާފައެވެ.