ހުޅުމާލޭގައި ފުޓްބޯޅަ ޓްރެއިނިންގ ފެސިލިޓީއެއް ގާއިމުކުރުމަށްޓަކައި ސަރުކާރުން އެޗްޑީސީ މެދުވެރިކޮށް އެފްއޭއެމްއަށް ދޫކުރި ބިން ކުއްޔަށް ދީގެން ލިބުނު ފައިސާގެ ތެރެއިން 29.6 މިލިއަން ރުފިޔާ ގެއްލިފައިވާކަން އޮޑިޓް ރިޕޯޓަކުން ހާމަވެއްޖެއެވެ.

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދޫކުރި ބިމުން ބައެއް ކުއްޔަށް ދިނުމުގެ މުއާމަލާތްތަކާ ގުޅޭގޮތުން ތައްޔާރުކޮށްފައިވާ ހާއްސަ އޮޑިޓް ރިޕޯޓުގައި ބުނެފައިވަނީ، އެ ބިމުގެ ތެރެއިން 12 ބްލޮކެއް ކޮމާޝަލް ބޭނުންތަކަށް ކުއްޔަށް ދޫކުރުމުގެ ހުއްދަ އެ އިދާރާއަށް ދީފައިވާ ކަމަށެވެ. މި ހުއްދައިގެ ދަށުން 2021 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް އެކި ފަރާތްތަކާއެކު 13 ސަބްލީސް އެއްބަސްވުމެއް އެފްއޭއެމްއިން ވަނީ އެކުލަވާލާފައެވެ. މީގެ އިތުރުން އެ ބިމުގައި ހުރި އެކޮމަޑޭޝަން ބްލޮކްގެ ތިން ފްލޯރއެއް ކުއްޔަށް ދިނުމަށް އިތުރު ދެ އެއްބަސްވުމެއް ވެސް ހަދާފައިވެއެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، މި އެއްބަސްވުންތަކުގެ ދަށުން 2025 ވަނަ އަހަރުގެ ނިޔަލަށް ކުލީގެ ގޮތުގައި ޖުމުލަ 56،150،354 ރުފިޔާ އެފްއޭއެމްއަށް ލިބެންޖެހެއެވެ. އެފްއޭއެމްގެ ރެކޯޑުތަކުން ދައްކާ ގޮތުގައި މީގެ ތެރެއިން 52،210،000 ރުފިޔާ މިހާތަނަށް އެ އިދާރާއަށް ލިބިފައިވެއެވެ. ނަމަވެސް، މީގެ ތެރެއިން 29،598،200 ރުފިޔާ އެފްއޭއެމްގެ އެއްވެސް ކަމަކަށް ބޭނުން ނުކުރެވި ގެއްލިފައިވާކަން އޮޑިޓުން ވަނީ ކަށަވަރުވެފައެވެ.

ގެއްލިފައިވާ ފައިސާގެ ތަފްސީލަށް ބަލާއިރު، ބިމުގެ ސްލޮޓްތަކާއި އިމާރާތުގެ ފްލޯރތައް ކުއްޔަށް ހިފި ފަސް ފަރާތަކުން ނަގުދު ފައިސާއާއި ޗެކުގެ ގޮތުގައި ދެއްކި 14،100،000 ރުފިޔާ ހިމެނެއެވެ. މި ފައިސާއަކީ އެފްއޭއެމްގެ އިސްވެރިންގެ ސޮޔާއި ސްޓޭމްޕް ޖަހާފައިވާ ރަސީދުތަކާއި ޕޭމަންޓް ވައުޗަރުތަކުން ފެންނަން ހުރި، އެކަމަކު އިދާރާގެ މާލީ ނިޒާމުގެ ތެރެއަށް ވަދެފައި ނުވާ ފައިސާއެވެ.

މީގެ އިތުރުން، އެފްއޭއެމްގެ ބޭންކް އެކައުންޓްތަކަށް ކުލީގެ ގޮތުގައި ޖަމާވި ފައިސާގެ ތެރެއިން 14،074،060 ރުފިޔާ އެކި އަމިއްލަ ކުންފުނިތަކާއި އަމިއްލަ ފަރުދުންގެ އެކައުންޓްތަކަށް ބަދަލުކޮށްފައިވާކަން ވެސް އޮޑިޓުން ވަނީ ހާމަވެފައެވެ. އަދި އެކި ފަހަރު މަތިން އެކައުންޓްތަކުން 1،424،140 ރުފިޔާ ނަގުދު ފައިސާގެ ގޮތުގައި ނަގާފައިވާކަން ވެސް ރެކޯޑުތަކުން ދައްކައެވެ.

މި މައްސަލަ ފެންމަތިވެފައިވާއިރު އެފްއޭއެމްގެ ފައިސާއަށް ޚިޔާނާތްތެރިވި މައްސަލަތަކެއް ސާބިތުވެ އެއިދާރާގެ ކުރީސް ރައީސް ބައްސާމް ގެންދަނީ ޖަލު ޙުކުމެއް ތަންފީޒު ކުރަމުންނެވެ.