މީސްމީޑިއާ މެދުވެރިކޮށް އިސްލާމްދީނަށް ތައުހީނުކޮށް ފުރައްސާރަކުރި މައްސަލައެއްގެ ތަހުގީގަށް މީހަކު ހޯދަން ފުލުހުން އިއުލާންކޮށްފިއެވެ.

މި މައްސަލައިގައި ފުލުހުން ހޯދަމުން ދަނީ ނ. ކުޑަފަރި، ހިޔަލީގެ، އުމުރުން 44 އަހަރުގެ ހުސައިން ޔޫސުފް އެވެ.

ފުލުހުން ހާމަކޮށްފައިވާ ގޮތުގައި، އޭނާގެ މައްޗަށް ކުރެވެނީ ޓިކްޓޮކް މެދުވެރިކޮށް އިސްލާމްދީނަށް ފުރައްސާރަކުރުމާއި، ދިވެހި ރައްޔިތުންގެ މެދުގައި އޮންނަ ދީނީ އެއްބައިވަންތަކަން ނަގާލަން މަސައްކަތްކުރުމުގެ ތުހުމަތެވެ. މީގެ އިތުރުން، ދީނީ ގޮތުން ބައިބައިވުން އުފެދޭ ފަދަ ވާހަކަތައް ދެއްކުމާއި، އިސްލާމްދީނުގެ އަސްލުތަކާ ގުޅޭގޮތުން ދޮގު މައުލޫމާތު ފެތުރިކަމުގެ ތުހުމަތުވެސް އޭނާގެ މައްޗަށް ވަނީ ކުރެވިފައެވެ.

ފުލުހުން ބުނީ، މި މައްސަލައިގެ ތަހުގީގަށް އޭނާ ހާޒިރުކުރަން ބޭނުންވި ނަމަވެސް، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމުގެ ޗިޓު ރައްދުކުރެވިފައި ނުވާ ކަމަށެވެ. އެހެންކަމުން، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާ އިޖުރާއަތުގެ ގަވާއިދުގެ 27 ވަނަ މާއްދާގެ ދަށުން، އާންމުކޮށް އިއުލާންކޮށް އޭނާ ހާޒިރުވުމަށް ވަނީ އަންގާފައެވެ.

މި މައްސަލައިގެ ސުވާލު ކުރުމަށްޓަކައި، މި މަހުގެ 18 ވަނަ ދުވަހުގެ މެންދުރު 12:00 އަށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގަށް ހާޒިރުވުމަށް ފުލުހުން ވަނީ ހުސައިން ޔޫސުފަށް އަންގާފައެވެ.