ދިވެހިރާއްޖޭގައި ބާއްވާ މައި ދެ އިންތިހާބު ކަމަށްވާ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ފެންނަ ނުފެންނަ ވޯޓެއްގައި ރައްޔިތުން "އާނއެކޭ" ބުނެފިނަމަ، ސަރުކާރު ޖަވާބުދާރީ ކުރުވުމަށް ރައްޔިތުންނަށް ލިބޭ އެންމެ ބޮޑު ފުރުސަތު ގެއްލިގެންދާނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ އެމްޑީޕީ މެންބަރު އަހުމަދު ދީދީ ވިދާޅުވެއްޖެއެވެ.

އައްޑޫ ސިޓީ މަރަދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ދީދީ ވިދާޅުވީ، ދެ އިންތިހާބު ވަކިން ބާއްވާތީ އުނދަގޫވެގެން އުޅެނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ކަމަށެވެ. އެގޮތުން 2023 ވަނަ އަހަރުގެ ރިޔާސީ އިންތިހާބާއި 2024 ވަނަ އަހަރުގެ މަޖިލީސް އިންތިހާބާ ދިމާކޮށް ރައްޔިތުންނަށް އެތައް ވައުދެއް ވެފައިވީ ނަމަވެސް، ލޯކަލް ކައުންސިލް އިންތިހާބު ބޯމަތިވިއިރު އެއްވެސް ވައުދެއް ފުއްދިފައި ނުވާ ކަމަށް އޭނާ ތުހުމަތު ކުރެއްވިއެވެ.

"އުނދަގޫ ވެގެން އުޅޭ ސަބަބަކީ 2023 ވަނަ އަހަރު ވެރިކަމަށް އައީ ރައްޔިތުންނަށް ވަރަށް ގިނަ ވައުދުތަކެއް ވަމުން، އަދި އެއަށްފަހު 2024 ގައި މަޖިލިސް އިންތިހާބާ ދިމާކޮށްވެސް ހަމަ އެހާ ގިނަ ވައުދުތަކެއް ވި. މި ވައުދުތައް ރައީސް މުއިއްޒު ވަމުން ގެންދަނީ ދޮގު ވައުދުތަކެއް ނުވާނެ ކަމަށް ވިދާޅުވެ، އަދި މިއީ ފުއްދައިދޭނެ ކަންކަން ކަމަށް ވިދާޅުވެ، ނަމަވެސް ލޯކަލް ކައުންސިލް އިންތިހާބު އައިސް ބޯމަތިވިއިރު ސަރުކާރަށް އެއްވެސް ވައުދެއް ފުއްދިފައި ނުވޭ. އެހެންވެ ރައްޔިތުން ސުވާލު ކުރަން ފެށީ. އެހެންވެ ރައްޔިތުންގެ ގާތަށް ނުދާންވެގެން ކުރާ ކަމެއް ދެ އިންތިހާބު އެއްކުރުމަކީ،" ދީދީ ވިދާޅުވިއެވެ.

ދީދީ އިތުރަށް ވިދާޅުވީ، އިންތިހާބުތައް އެއްކޮށްލުމަކީ ސަރުކާރުން ރައްޔިތުންނަށް ޖަވާބުދާރީވުމުން ރެކެން ކުރާ ކަމެއް ކަމަށާއި، އެހެންކަމުން ކުރިއަށް އޮތް ފެންނަ ނުފެންނަ ވޯޓުގައި މިކަމަށް "ނޫނެކޭ" ބުނަން ޖެހޭ ކަމަށެވެ.

އައްޑޫ ސިޓީގެ ތަރައްގީއާ ގުޅޭގޮތުން ވާހަކަދައްކަވަމުން ދީދީ ފާހަގަކުރެއްވީ، އެމްޑީޕީގެ ސަރުކާރުގައި ނޫނީ އައްޑޫއަށް އެކަށީގެންވާ ތަރައްގީއެއް ލިބިފައި ނުވާ ކަމަށެވެ. މި ސަރުކާރަށް ތިން އަހަރު ވާން ކައިރިވެފައިވާއިރު އައްޑޫގައި އެއްވެސް މަޝްރޫއެއް ކުރިއަށް ގެންގޮސްފައި ނުވާ ކަމަށާއި، އަދި ކުރީ ސަރުކާރުން ފަށާފައިވާ އެތައް މަޝްރޫއެއް ހުއްޓިފައިވާ ކަމަށް ދީދީ ފާހަގަކުރެއްވިއެވެ.

"ސޮއި އެބަ އަޅާ ކަރުދާސްތަކުގައި، މިދިޔަ ޑިސެމްބަރު ރައީސް މުއިއްޒު އައްޑޫއަށް ކުރި ދަތުރުގައި 16 ޕްރޮޖެކްޓެއްގައި ސޮއިކުރި. އަދި އެއްވެސް ކަމެއް ނުފެށޭ. އަދި ކުރިއަށް އޮތް ދެ އަހަރާއި ބައި ތެރޭ މިކަން ކުރެވޭނެ ކަމަށް ގަބޫލެއްވެސް ނުކުރެވޭ،" ދީދީ ވިދާޅުވިއެވެ.

ދީދީ ވިދާޅުވި ގޮތުގައި މިހާރު ރާއްޖޭގެ އިގްތިސާދު އޮތް ހާލަތުންނާއި، ސަރުކާރުގެ ތަސައްވުރެއް ނެތުމުގެ ސަބަބުން އިގްތިސާދު ކޮޅަށް ޖެހޭނެ ކަމުގެ އުންމީދެއް ނެތެވެ. އެހެންކަމުން، އައްޑޫ ސިޓީއަށް ހަގީގީ ތަރައްގީ ގެންނަން ބޭނުންވާނަމަ، ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީގެ ކެންޑިޑޭޓުންނަށް ވޯޓު ދިނުމަށް އޭނާ ވަނީ ރައްޔިތުންނަށް ގޮވާލައްވާފައެވެ.