ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން ރާއްޖޭގެ އިގްތިސާދަށް އޭގެ ނޭދެވޭ އަސަރު ކުރާނެ ކަމަށާއި، ސިޔާސީ ކަންކަމުގައި މަޝްވަރާކުރަން ތިއްބާ ގައުމުގެ ހާލަތު ގޯސްވެދާނެ ކަމަށް ރައްޔިތުންގެ ޚާއްސަ މަޖިލީހުގެ ކުރީގެ މެންބަރު އަހުމަދު ނަސީމް (ނަފާ ނަސީމް) އިންޒާރު ދެއްވައިފިއެވެ.

ނަފާ ނަސީމް މިގޮތަށް އިންޒާރު ދެއްވީ، އިޒްރޭލާއި އެމެރިކާ ގުޅިގެން އިރާނާ ދެކޮޅަށް ފަށާފައިވާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގަށް ބޮޑެތި ބަދަލުތަކެއް އައިސް، ރާއްޖޭގައި ވެސް ތެލުގެ އަގު އުފުލިފައިވާ ދަނޑިވަޅެއްގައެވެ.

އެކްސްގައި ހިއްސާކުރެއްވި ޕޯސްޓެއްގައި ނަފާ ނަސީމް ފާހަގަކުރެއްވި ގޮތުގައި، މަތިންދާބޯޓު ދުއްވަން ބޭނުންކުރާ ޖެޓް ފިއުލްގެ އަގު މިހާރު ވަނީ 71 އިންސައްތަ އުފުލިފައެވެ. މީގެ ސަބަބުން ފްލައިޓް ޓިކެޓްގެ އަގުތައް އުފުލި، ރާއްޖެއަށް އަންނަ ފަތުރުވެރިންނާއި ދަތުރުވެރިންގެ އަދަދު މަދުވެދާނެ ކަމުގެ ބިރު އޮތް ކަމަށް އޭނާ ވިދާޅުވިއެވެ.

އިގްތިސާދީ މި ނާޒުކު ހާލަތުގައި ސިޔާސީ ގޮތުން ކުރެވެމުންދާ މަޝްވަރާތަކަށް ފާޑުވިދާޅުވަމުން ނަފާ ނަސީމް ވިދާޅުވީ، ވެރިކަމާއި ދެ އިންތިޚާބު އެއްކުރުމުގެ ވާހަކަތަކުގައި މަޝްއޫލުވެގެން ތިއްބާ ގައުމު އަވަދިވެދާނެ ކަމަށެވެ.

"ހޭއަރާތިބޭ. އެންމެ އަވަހަށް އަސަރުކުރާނީ ފަގީރުންނަށް. ވެރިކަމާ ދެއިންތިޚާބު އެއްކުރަން ސައްލާކުރަންތިއްބަ ގައުމު އަވަދިވެދާނެ ދަރިންނޭ،" ނަފާ ނަސީމްގެ ޕޯސްޓުގައި ވިދާޅުވެފައި ވެއެވެ.

ރާއްޖޭގެ ބާޒާރުގައި ތެލުގެ އަގު އުފުލިފައި މިވަނީ، ތެލުގެ އަގާ މެދު ކަންބޮޑުވާން ނުޖެހޭ ކަމަށާއި އަގު ބޮޑުވާނެ ކަމުގެ އެއްވެސް އިޝާރާތެއް ނެތް ކަމަށް ރައީސް ޑރ. މުޙައްމަދު މުއިއްޒު ވިދާޅުވެފައި ވަނިކޮށެވެ. ރައީސް މިހެން ވިދާޅުވި ނަމަވެސް އެސްޓީއޯއިން މިހާރު ވަނީ ޕެޓްރޯލް ލީޓަރަކުން 2.51 ރުފިޔާ އަދި ޑީސަލް ލީޓަރަކުން 3.62 ރުފިޔާ ބޮޑުކޮށްފައެވެ.