މިހާރު ހިނގަމުންދާ ހަނގުރާމައިގެ ނޭދެވޭ އަސަރު އެންމެ ބޮޑަށް ފޯރާނީ ރާއްޖޭގެ ފަތުރުވެރިކަމަށް ކަމަށް ފާހަގަކުރައްވައި، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އާއެކު ސަރުކާރުން ކުއްލި މަޝްވަރާތަކެއް ބޭއްވުމަށް އެމް.ޑީ.ޕީގެ ރައީސް ޢަބްދުﷲ ޝާހިދު ގޮވާލައްވައިފިއެވެ.

ޝާހިދު މިފަދައިން ގޮވާލެއްވީ، ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންގެ ކެމްޕޭނަށް ށ. އަތޮޅަށް ކުރައްވަމުން ގެންދަވާ ދަތުރުފުޅުގައި، ށ. ފޯކައިދޫގައި ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ. ކުރީގެ ފޮރިން މިނިސްޓަރު އަބުދު ﷲ ޝާހިދު ވިދާޅުވީ، މިހާރުގެ ސަރުކާރުގެ އިސް ސަފުގައި ތިއްބެވި ބޭފުޅުންނަށް މިފަދަ ނާޒުކު ދަނޑިވަޅުތަކުގައި ކަންކަން މެނޭޖުކުރާނެ ގޮތް އެނގިވަޑައިނުގަންނަވާ ކަމަށެވެ. އެހެންކަމުން، ދާއިރާގެ ތަޖުރިބާކާރުންނާ ބައްދަލުކުރައްވައި، އިޤްތިޞާދީ ގޮންޖެހުންތަކުން އަރައިގަނެވޭނެ ގޮތްތަކާ މެދު މަޝްވަރާކުރެއްވުމަށް ސަރުކާރަށް ޝާހިދު އިލްތިމާސްކުރެއްވިއެވެ.

ފަތުރުވެރިކަމުގެ ސިނާޢަތް ރައްކާތެރިކުރުމަށްޓަކައި، ކަމާބެހޭ މާހިރުންގެ ލަފަޔާއި އިރުޝާދު ހޯދުމަކީ މިވަގުތު އެންމެ އިސްކަންދޭންޖެހޭ ކަންތައް ކަމުގައި ޝާހިދު ފާހަގަކުރެއްވިއެވެ.

"ސަރުކާރުގައި އެކަމުގެ ގާބިލުކަމެއް ނެތް. އެހެންކަމުން، މަޓީ އާއި ދާއިރާގެ ތަޖުރިބާކާރުންގެ އެހީތެރިކަން ހޯދަން އެބަޖެހޭ. އަޅުގަނޑު މި އެދެނީ ސަރުކާރުން މިކަމަށް އިޖާބަދީ، ތަޖުރިބާކާރުންގެ ލަފާގެ މަތިން އަމަލުކުރުމަށް،" ޝާހިދު ވިދާޅުވިއެވެ.

ރައްޔިތުންގެ މަޖިލީހުގެ ރައީސް ކަންވެސް މީގެ ކުރިން އަދާކުރެއްވި ޝާހިދު ވިދާޅުވީ މިއީ ސިޔާސީ ބޭނުމެއްގައި ދެއްކެވި ވާހަކަފުޅެއް ނޫން ކަމަށާއި، މިއީ ގައުމުގެ ހާލަތު އޮތްގޮތުން ސަރުކާރަށް އެރުވި އިޚްލާޞްތެރި އިރުޝާދެއް ކަމަށެވެ. އަދި ސަރުކާރުގެ މަސްއޫލުވެރިންގެ ކިބައިގައި އިޚްލާޞްތެރިކަމެއް ނެތްކަމަށް ތުހުމަތުކުރައްވައި، ރާއްޖޭގެ ފަތުރުވެރިކަން އިތުރަށް ހީނަރުވުމުގެ ކުރިން، ދާއިރާގެ މާހިރުންގެ ލަފަޔާއެކު ހަރުދަނާ ފިޔަވަޅުތަކެއް އެޅުމަށް ޝާހިދު ވަނީ ތަކުރާރުކޮށް ގޮވާލައްވާފައެވެ.