މިއަދު ބޭއްވި އިންތިހާބުގައި މާލެ ސިޓީގެ މޭޔަރުކަމުގެ ގޮނޑި، މިހާރުގެ ވެސް މޭޔަރު އާދަމް އާޒިމް ދިފާއުކުރަށްވާކަން ވަގުތީ ނަތީޖާއިން ދައްކައިފިއެވެ.

މިހާތަނަށް ގުނި ވޯޓު ފޮށިތަކުން އާޒިމް ވަނީ 3،000 އަށްވުރެ ގިނަ ވޯޓު ކާމިޔާބު ކުރަށްވައި، ވާދަވެރި ކެންޑިޑޭޓުންނަށްވުރެ ބޮޑު ތަފާތަކުން ކުރި ހޯއްދަވާފައެވެ. ​މި އިންތިޚާބުގެ ދެވަނަ މަގާމުގައި މިވަގުތު އޮތީ ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ވާދަކުރައްވާ މޫސާ އަލީ ޖަލީލެވެ.

އަދި އަމިއްލަ ގޮތުން ވާދަކުރައްވާ އިސްމާއީލް ޒަރިޔަންދު އޮތީ މިހާތަނަށް ލިބުނު ނަތީޖާތަކުން ތިންވަނަ މަގާމުގައެވެ. ​މާލޭގެ އިތުރުން ރާއްޖޭގެ އެހެން ބޮޑެތި ސިޓީތަކުން ވެސް މިވަގުތު ކުރީގައި އުޅެނީ އެމްޑީޕީގެ ކެންޑިޑޭޓުންނެވެ. އެގޮތުން އައްޑޫ ސިޓީ އާއި ކުޅުދުއްފުށި ސިޓީގެ މޭޔަރުކަމުގެ ރޭހުގައި ވެސް ކުރީގައި އުޅެނީ އިދިކޮޅު އެމްޑީޕީގެ ކެންޑިޑޭޓުންނެވެ.

ދިވެހިރާއްޖޭގެ އިދާރީ ދާއިރާތައް ހިންގުމަށްޓަކައި ނުހަނު މުހިންމު މި އިންތިޚާބުގައި، ލޯކަލް ކައުންސިލްތަކަށް އިންތިޚާބުކުރަންޖެހޭ ގޮނޑިތަކަށް 1،368 ކެންޑިޑޭޓުން ވާދަކޮށްފައިވެއެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ގޮނޑިތަކަށް 1،593 ކެންޑިޑޭޓުން ވާދަކޮށްފައިވެއެވެ.

އިންތިޚާބުގެ ފައިނަލް ނަތީޖާ މުޅިން ސާފުވާއިރު، މައިގަނޑު ސިޓީތަކުގެ ކޮންޓްރޯލް އެމްޑީޕީން ދަމަހައްޓާނެ ކަމަށް މިހާރުގެ ނަތީޖާތަކުން ދައްކައެވެ.