އިސްލާމްދީނުގައި މައިންނަށް ދީފައިވާ މަތިވެރި ގަދަރާއި މިއަދުގެ ދުނިޔޭގައި އެކަމުގެ ނަމޫނާ ދައްކަވާ ޝަޚްޞިއްޔަތުންގެ ވާހަކައަކީ އަބަދުވެސް ފާހަގަކޮށްލެވޭ ކަންކަމެވެ.

އެގޮތުން ތުރުކީވިލާތުގެ ރައީސް ރަޖަބް ޠައްޔިބު އުރުދުޣާން، އެމަނިކުފާނުގެ މަރުހޫމް މައިދައިތަ ނުވަތަ މަންމާފުޅު، ތެންޒީލޭ އުރުދުޣާންގެ މަތިން ހަނދުމަކުރައްވައި ދައްކަވާ ވާހަކަފުޅުތަކަކީ ގިނަ ބައެއްގެ ސަމާލުކަން ހުއްޓޭ ކަމެކެވެ.

އުރުދުޣާން ވަނީ އެމަނިކުފާނުގެ މަންމާފުޅަށް އޮތް ފުން ލޯތްބާއި އިޙްތިރާމް ހާމަކުރައްވައި، މަންމާފުޅު ދުނިޔޭގައި ހުންނެވި ދުވަސްވަރު އެކަމަނާގެ ފައިތިލަފުޅުގައި ބޮސްދެއްވުމަކީ އާދައެއްގެ ގޮތުގައި ކުރެއްވި ކަމެއްކަމަށް ތަކުރާރުކޮށް ވިދާޅުވެފައެވެ.

މި ޢަމަލަކީ ހަމައެކަނި ލޯބި ހާމަކުރުމެއް ނޫންކަން ބަޔާންކުރައްވަމުން ރައީސް އުރުދުޣާން ވިދާޅުވެފައިވަނީ، އެއީ އެމަނިކުފާނަށް "ސުވަރުގޭގެ މީރުވަސް" އިހުސާސް ކުރެއްވުމަށް ކުރެއްވި ކަމެއް ކަމަށެވެ.

މިއީ މާތްވެގެންވާ އިސްލާމްދީނުގެ މަތިވެރި އިރުޝާދެއް ކަމުގައިވާ، "ސުވަރުގެވަނީ މައިންގެ ފައިތިލަދަށުގައި" ކަމަށް އޮންނަ މަޝްހޫރު ފިލާވަޅާއި ތަޢުލީމުގެ މައްޗަށް ބިނާކޮށް އެމަނިކުފާނު ކުރެއްވި ކަމެކެވެ.

މައިންނަށް ކަމޭހިތުމާއި އޯގާތެރިވުމުގެ މި ނަމޫނާއަކީ މުޅި އިސްލާމީ އުންމަތަށްވެސް އުރުދުޣާން ދޫކޮށްލެއްވި އަސަރުގަދަ މެސެޖެކެވެ.