އެމްޑީޕީގެ ޗެއާޕާސަންގެ އިންތިހާބުގެ ފޯރިގަދަވެފައި ވަނިކޮށް، އެ ޕާޓީގެ ކުރީގެ ސަރުކާރުގައި ރައީސް އޮފީހުގެ ޗީފް އޮފް ސްޓާފްގެ މަގާމު އަދާކުރެއްވި އަދާލަތު ޕާޓީގެ އަލީ ޒާހިރު (އަލިޕީ) އާއި އެމްޑީޕީގެ ކުރީގެ މަޖިލިސް މެންބަރު މުހައްމަދު ވަހީދު (ވައްޑެ) އާ ދެމެދު ބަހުގެ ހަމަލާތަކެއް ބަދަލުކުރައްވައިފިއެވެ.

މި މައްސަލަ ހޫނުވެގެން ދިޔައީ، ޗެއާޕާސަން އިންތިހާބުގައި ވާދަކުރައްވާ މީކާއިލް އަހުމަދު ނަސީމުގެ ކެމްޕެއިންގައި އަދާލަތު ޕާޓީގެ ބޭފުޅުން ހަރަކާތްތެރިވަމުންދާތީ އެކަމަށް ވައްޑެ ފާޑުވިދާޅުވުމުންނެވެ.

​ވައްޑެ އެކްސްގައި ކުރެއްވި ޕޯސްޓެއްގައި ވިދާޅުވީ މީކާއިލްގެ "އިތުބާރު" ކެމްޕެއިން މައި އޮފީހުގެ މެނޭޖަރަކަށް އަލިޕީ ހުންނެވި ކަމަށާއި، މިހާރު އެ ކެމްޕެއިންގައި އެމްޑީޕީގެ އަސްލު ވަންތަކަން ހުރި މީހަކު ނެތް ކަމަށެވެ. އެމްޑީޕީގެ ތެރޭގައި އޮންނަ ނަޝީދުގެ ފެކްޝަންގެ ބޭފުޅުން އަބަދުވެސް ފާޑުވިދާޅުވަމުން ގެންދަވާ އަލިޕީއަށް އަމާޒުކޮށް ވައްޑެ ކުރެއްވި މި ތުހުމަތުތަކަށް އަލިޕީ ވަނީ ވަރަށް ހޫނު ރައްދެއް ދެއްވާފައެވެ.

​އަލިޕީ ދެއްވި ރައްދުގައި ވިދާޅުވީ އެމްޑީޕީގެ އިންތިހާބުގެ ތެރެއަށް އޭނާ ވައްދައިގެން ވާހަކަ ދެއްކުމަށް ވައްޑެ މަސައްކަތްކުރައްވާ ކަމަށެވެ. އަދި އޭނާއާ ބެހޭގޮތުން ވާހަކަ ދައްކަން ފަށައިފިނަމަ ދައްކަން ހުރި ގިނަ ވާހަކަތަކެއް އެބަހުރި ކަމަށާއި، އަމިއްލަ ނަފްސުގެ ދިފާއުގައި އަލިޕީ ވިދާޅުވީ ކޮންމެ ޕާޓީއެއްގައި ހުރި ނަމަވެސް، މިދިޔަ ރިޔާސީ އިންތިހާބާ ދިމާކޮށް އެމްޑީޕީ ދޫކޮށްދިޔަ މީހުންނަށް ވުރެ ވެސް އޭނާ އެމްޑީޕީއަށް މާބޮޑަށް ވަފާތެރިވާނެ ކަމަށެވެ.

​އަންނަ ހުކުރު ދުވަހު ބާއްވާ އެމްޑީޕީގެ ޗެއާޕާސަން އިންތިހާބުގައި ވާދަކުރައްވަނީ މީކާއިލްގެ އިތުރުން ކުރީގެ ރައީސް މުހައްމަދު ނަޝީދެވެ. މި އިންތިހާބަކީ ރައީސް އިބްރާހިމް މުހައްމަދު ސޯލިހުގެ ފެކްޝަނާއި ނަޝީދުގެ ފެކްޝަންގެ ވާދަވެރިކަން ވަރަށް ބޮޑަށް ފެނިގެންދާ އިންތިހާބަކަށް ވާއިރު، އަދާލަތު ޕާޓީގެ ބޭފުޅުންގެ ނުފޫޒު އެމްޑީޕީގެ އެތެރޭގެ ކަންކަމުގައި އޮތުމަކީ ނަޝީދުގެ ފެކްޝަންގެ ބޭފުޅުންގެ ބޮޑު ކަންބޮޑުވުމެކެވެ.