އިންޑިއާގެ ސިނަމާގައި ތަފާތު އެކި ރޯލުތަކުން ފެނިގެންގޮސްފައިވާ ތަޖުރިބާކާރު އެކްޓަރު ޕްރަދީޕް ސިންގް ރާވަތު، އުމުރުން 74 އަހަރުގައި މަރުވެއްޖެއެވެ.

އޭނާ މަރުވީ ކެންސަރު ބައްޔާ ދިގު މުއްދަތަކަށް ހަނގުރާމަކުރުމަށްފަހު، 4 އޯގަސްޓް 2026 ވީ އާދީއްތަ ދުވަހުގެ އިރުއޮއްސި 6:00 އާއި 6:30 އާ ދެމެދު މުމްބާއީގައެވެ.

މީޑިއާ ރިޕޯޓްތަކުން އެނގޭގޮތުގައި ޕްރަދީޕް މަރުވީ ލޭގެ ކެންސަރު (ބްލަޑް ކެންސަރު) ޖެހިގެންނެވެ. މީގެ ހަތަރު އަހަރު ކުރިން އޭނާ ވަނީ މި ބަލިން ސަލާމަތްވެފައެވެ. ނަމަވެސް، މީގެ ދޮޅު މަހެއްހާ ދުވަސް ކުރިން ބަލި އަލުން ޖެހި، ފާއިތުވި މަހެއްހާ ދުވަހު އޭނާ އޮތީ ހޮސްޕިޓަލުގައި ފަރުވާ ހޯދާށެވެ. އޭނާގެ ހާލަތު ގޯސްވީ ލޭގެ ޕްލޭޓްލެޓްސް ވަރަށް ބޮޑަށް ދަށަށް ދިއުމުގެ ސަބަބުންނެވެ.

ޕްރަދީޕް ރާވަތު މަރުވި ޚަބަރު އެންމެ ފުރަތަމަ އާންމުކުރީ އޭނާއާއެކު "ލަގާން" ފިލްމުގައި މަސައްކަތްކުރި އެކްޓަރު ޔަޝްޕާލް ޝަރްމާއެވެ. މި ހިތާމަވެރި ޚަބަރާއެކު އިންޑިއާގެ ފިލްމީ ދާއިރާގެ ގިނަ ފަންނާނުންނާއި ސަޕޯޓަރުން ދަނީ ތައުޒިޔާ ކިޔަމުންނެވެ. އޭނާގެ ފަހުވަގުތުގެ ކަންކަން ނިންމުމަށް ހަމަޖެހިފައިވަނީ 5 އޯގަސްޓް 2026 ގައެވެ.

ޕްރަދީޕަކީ 1988 ވަނަ އަހަރުގެ މަޝްހޫރު "މަހާބާރަތު" ސީރީޒްގައި އަޝްވަތަމާގެ ރޯލުން މަގުބޫލުކަން ހޯދި އެކްޓަރެކެވެ. އޭނާގެ ކެރިއަރުގައި އެންމެ ފާހަގަކޮށްލެވޭ އެއް މަސައްކަތަކީ "ގަޖިނީ" ފިލްމުގައި ކުޅުނު ނުލަފާ ވިލަންގެ ރޯލެވެ. ސޫރިޔާގެ ތަމަޅަ ފިލްމުގެ އިތުރުން އާމިރު ޚާންގެ ހިންދީ ފިލްމުގައި ވެސް އޭނާ ވަނީ މި ރޯލު ވަރަށް މޮޅަށް އަދާކޮށްފައެވެ. މީގެ އިތުރުން 2001 ވަނަ އަހަރު ނުކުތް "ލަގާން" ފިލްމުގެ 'ދޭވާ' ގެ ރޯލަކީ ވެސް އޭނާގެ ފާހަގަކޮށްލެވޭ މަސައްކަތެކެވެ.

އޭނާ ވަނީ ހިންދީ، ތަމަޅަ، ތެލެގޫ އަދި މަލަޔާޅަމް ހިމެނޭހެން އިންޑިއާގެ އެކި ބަސްބަހުން އުފައްދާފައިވާ ގިނަ ފިލްމުތަކެއްގައި މަސައްކަތްކޮށްފައެވެ. މީގެ ތެރޭގައި "ޗަތުރަޕަތީ"، "ލަކްޝްމީ" އަދި މަހޭޝް ބާބޫގެ "1: ނެނޮކަޑީން" ފަދަ ފިލްމުތައް ހިމެނެއެވެ. ޕްރަދީޕް އެންމެ ފަހުން ފެނިގެންދިޔައީ ތެލެގޫ ފިލްމު "ގާޔަޕައްޑާ ސިމްހަމް" އިންނެވެ.

ޕްރަދީޕް ރާވަތު މަރުވިއިރު އޭނާގެ އަންބަކާއި ފިރިހެން ދަރިއަކު ދުނިޔޭގައި އެބަހުއްޓެވެ. އެއީ އަންހެނުން ކަލްޔާނީ ރާވަތާއި ދަރިފުޅު ވިކްރަމާދިތުޔާ ރާވަތެވެ.