މި ހިނގާ މަހުގެ 13 ވަނަ ދުވަހުގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި ޖުމްލަ 27.1 ބިލިއަން ރުފިޔާ ލިބިފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

މައިގަނޑު ގޮތެއްގައި ޓެކްސް އާމްދަނީ އާއި ވައިގެ ބަނދަރުން ނަގާ އެކިއެކި ފީތަކުން ލިބުނު ފައިސާ އިތުރުވެފައިވާއިރު، މި މުއްދަތުގައި އެއާޕޯޓް ސާވިސް ޗާޖާއި ޑިޕާޗާ ޓެކްސްގެ ގޮތުގައި އެކަނިވެސް ދައުލަތަށް ވަނީ 1.2 ބިލިއަން ރުފިޔާ ލިބިފައެވެ.

ފިނޭންސް މިނިސްޓްރީން އާންމުކޮށްފައިވާ "ވީކްލީ ފިސްކަލް ޑިވަލޮޕްމަންޓްސް" ރިޕޯޓަށް ބަލާއިރު، މިއަހަރުގެ މިހާތަނަށް ލިބުނު އާމްދަނީއަކީ މިދިޔަ އަހަރުގެ މި މުއްދަތުގައި ލިބުނު 24.6 ބިލިއަން ރުފިޔާއާ އަޅައިބަލާއިރު 2.6 ބިލިއަން ރުފިޔާ ނުވަތަ 10.4 އިންސައްތައިގެ ކުރިއެރުމެކެވެ. މާލީ ވުޒާރާއިން ފާހަގަކުރި ގޮތުގައި އާމްދަނީ މައްޗަށް ދިޔުމުގެ މައިގަނޑު ސަބަބަކީ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ އަގުން ނަގާ ޓެކްސް (ޓީޖީއެސްޓީ) އިން ލިބުނު މިންވަރު އިތުރުވުމެވެ.

ދައުލަތަށް ވަން އާމްދަނީގެ އެންމެ ބޮޑު ހިއްސާއެއް އަދާކުރަނީ ޓެކްސްގެ އާމްދަނީއެވެ. އެގޮތުން ޓެކްސްގެ ގޮތުގައި 21.1 ބިލިއަން ރުފިޔާ ލިބިފައިވާއިރު، މިއީ ވޭތުވެދިޔަ އަހަރަށްވުރެ 11.9 އިންސައްތައިގެ ކުރިއެރުމެކެވެ. މީގެ ތެރޭގައި ޓީޖީއެސްޓީގެ ގޮތުގައި ލިބުނު 7.2 ބިލިއަން ރުފިޔާއާއި، އާންމު ޖީއެސްޓީގެ ގޮތުގައި ލިބުނު 3.5 ބިލިއަން ރުފިޔާ ހިމެނެއެވެ. މީގެ އިތުރުން ވިޔަފާރީގެ ފައިދާއިން ނަގާ ޓެކްސްގެ ގޮތުގައި 5.4 ބިލިއަން ރުފިޔާ ލިބިފައިވާއިރު، އިމްޕޯޓް ޑިއުޓީން 2.1 ބިލިއަން ރުފިޔާ އަދި ގްރީން ޓެކްސްގެ ގޮތުގައި ވަނީ 1.4 ބިލިއަން ރުފިޔާ ލިބިފައެވެ.

ޓެކްސް ނޫން ގޮތުގައި ދައުލަތަށް 5.6 ބިލިއަން ރުފިޔާ ލިބިފައިވާއިރު، މީގެ ތެރޭގައި ހަރުމުދަލުގެ އާމްދަނީން ލިބުނު 1.7 ބިލިއަން ރުފިޔާއާއި، ރިސޯޓުތަކުގެ ކުލީގެ ގޮތުގައި ލިބުނު 1.2 ބިލިއަން ރުފިޔާ ހިމެނެއެވެ. އަދި އެއާޕޯޓް ޑިވެލޮޕްމަންޓް ފީގެ ގޮތުގައި 1.2 ބިލިއަން ރުފިޔާ ލިބިފައިވާ އިރު، ހިލޭ އެހީގެ ގޮތުގައި ލިބުނު މިންވަރު ވަނީ 460.4 މިލިއަން ރުފިޔާއަށް އަރައި، ބޮޑު ކުރިއެރުމެއް ހޯދާފައެވެ.

އާމްދަނީ އިތުރުވި ނަމަވެސް، ދައުލަތުގެ ޖުމްލަ ޚަރަދު ވަނީ މިދިޔަ އަހަރާ އަޅައިބަލާއިރު 19.3 އިންސައްތަ މައްޗަށް ގޮސް، 28.1 ބިލިއަން ރުފިޔާއަށް އަރާފައެވެ. އެންމެ ބޮޑު ހޭދައެއް ހިނގާފައިވަނީ ސަބްސިޑީއަށާއި ހިންގުމުގެ ޚަރަދުތަކަށެވެ. އެގޮތުން ސަބްސިޑީއަށް ކުރި ޚަރަދު 3.5 ބިލިއަން ރުފިޔާއަށް އަރާފައިވާއިރު، މުވައްޒަފުންގެ މުސާރައާއި ޕެންޝަނަށް 9.4 ބިލިއަން ރުފިޔާ އަދި އިދާރީ ހިންގުމުގެ ޚަރަދުތަކަށް ވަނީ 15.0 ބިލިއަން ރުފިޔާ ހޭދަވެފައެވެ. މީގެ އިތުރުން އާސަންދައަށް 1.4 ބިލިއަން ރުފިޔާ އަދި ދަރަންޏާއި އިންޓްރެސްޓް ދެއްކުމަށް 3.3 ބިލިއަން ރުފިޔާ ވަނީ ޚަރަދުވެފައެވެ.

ތަރައްގީގެ މަޝްރޫއުތަކަށް ނުވަތަ ކެޕިޓަލް ޚަރަދުގެ ގޮތުގައި 3.6 ބިލިއަން ރުފިޔާ ހޭދަކޮށްފައިވީ ނަމަވެސް، ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް ކުރި ޚަރަދު ވަނީ މިދިޔަ އަހަރާ އަޅައިބަލާއިރު 30 އިންސައްތަ ދަށްވެފައެވެ. މާލީ ވުޒާރާގެ ހިސާބުތަކުން ދައްކާ ގޮތުގައި، މިމަހުގެ 13 ވަނަ ދުވަހުގެ ނިޔަލަށް ދައުލަތުގެ ބަޖެޓުގެ ޕްރައިމަރީ ސާޕްލަސް 2.4 ބިލިއަން ރުފިޔާގައި ހުރި ނަމަވެސް، ބަޖެޓުގެ ޖުމްލަ ބެލެންސް މިހާރު އޮތީ 950.3 މިލިއަން ރުފިޔާގެ ޑެފިސިޓެއްގައެވެ.