ނޭޕާލާއި ޗައިނާގެ ޓިބެޓް ގުޅޭ ސަރަހައްދީ ރޮނގު ކައިރިއަށް ކުއްލިއަކަށް އައި ނުރައްކާތެރި ފެންބޮޑުވުމެއްގައި (ފްލޭޝް ފްލަޑް) މަދުވެގެން 150 އަށްވުރެ ގިނަ މީހުން މަރުވެ، ސަތޭކައަށް ވުރެ ގިނަ މީހުން ގެއްލިއްޖެއެވެ.

ހިމާލަޔާ ސަރަހައްދުގެ ބޮޓޭކޯޝީ އަދި ތްރިޝޫލީ ކޯރުގެ އައްސޭރީގައިވާ އަވަށްތަކަށް ބޮޑެތި ގެއްލުންތަކެއް ލިބުނު މި ހާދިސާ ހިނގަން މެދުވެރިވީ، އުސް ފަރުބަދައަކުން ގަނޑުފެނުގެ ބޮޑު ފަށަލައެއް (ގްލޭޝިއަރެއް) ކަނޑައިގެން ގޮސް، ކިސަޑާއި ގަލާއި އައިސް އެކުވެގެން އުފެދުނު ބިޔަ އޮއިވަރެއް ތިރިއަށް ފައިބައިގަތުމުގެ ސަބަބުންނެވެ.

މި ހާދިސާގައި ގެއްލުނު މީހުންގެ ތެރޭގައި އެކި ޤައުމުތަކަށް ނިސްބަތްވާ 290 އަށްވުރެ ގިނަ ފަތުރުވެރިން ހިމެނެއެވެ. މީގެ ތެރޭގައި ކައިލާޝް މާނަސަރޯވަރަށް ޒިޔާރަތްކުރި އިންޑިއާގެ ޒިޔާރަތްތެރިންގެ އިތުރުން، އިނގިރޭސިވިލާތާއި އެމެރިކާ އަދި އެހެނިހެން ޤައުމުތަކުގެ ފަތުރުވެރިންވެސް ހިމެނެއެވެ.

ޓިބެޓާއި ނޭޕާލް ގުޅޭ އިމިގްރޭޝަން ޗެކްޕޮއިންޓް ކައިރީގައި އޮންނަ ސުޔާޕްރޫ ބޭޝީ އަވަށުގެ ގިނަ ޢިމާރާތްތަކެއް ވަނީ، ސުނާމީއެއް ފަދައިން އައި ބާރުގަދަ ކިސަޑު ފެންގަނޑާއެކު އެއްކޮށް ހަލާކުވެ، ދަމައިގަނެގެން ގޮސްފައެވެ.

ކަމާބެހޭ މާހިރުންނާއި ސައިންސްވެރިން ހާމަކުރާ ގޮތުގައި، މި ހާދިސާ ހިނގާފައިވަނީ ކުރިން ލަފާކުރެވުނު ފަދައިން ބިންހެލުމެއްގެ ސަބަބުންނެއް ނޫނެވެ. އޭގެ ބަދަލުގައި، ހިމާލަޔާގެ އުސް ފަރުބަދައަކުން ވެއްޓުނު ބިޔަ ގަނޑުފެންގަނޑު ތިރިއަށް ވެއްޓުމުގައި އުފެދުނު ގަދަފަދަ ބާރާއި ކޭއްތުމުގެ ސަބަބުން، އައިސްގަނޑު ވަގުތުން ފެނަށް ބަދަލުވެ، ވިއްސާރައިގެ ސަބަބުން ފުރިފައިވާ ކޯރުތަކަށް އެއްފަހަރާ ބަންޑުންވުމުންނެވެ.

މި ކާރިސާގެ ސަބަބުން އެ ސަރަހައްދުގެ 19 ފާލަމަކާއި، މައި މަގުތަކުގެ އިތުރުން ފެނުން ކަރަންޓު އުފައްދާ ހައިޑްރޯޕަވަރ ޕްލާންޓްތަކަށް ވަނީ ބޮޑެތި ގެއްލުންތަކެއް ލިބިފައެވެ. އަދި މުއާޞަލާތީ ޚިދުމަތްތައްވެސް ވަނީ މުޅިންހެން މެދުކެނޑިފައެވެ.

މިވަގުތު ނޭޕާލާއި ޗައިނާގެ އަސްކަރިއްޔާއާއި މީހުން ސަލާމަތްކުރާ ޓީމުތަކުން ހުއްޓުމެއްނެތި ދަނީ ސަލާމަތީ މަސައްކަތްތައް ކުރަމުންނެވެ. އެހެންނަމަވެސް، ދަތުރުފަތުރުކުރާ މަގުތައް ހަލާކުވެފައިވުމާއި މޫސުން ގޯސްވުމުގެ ސަބަބުން، އެހީތެރިކަން ފޯރުކޮށްދިނުމުގައި ބޮޑެތި ދަތިތަކަކާ ވަނީ ކުރިމަތިލާން ޖެހިފައެވެ.