ނޭޕާލަށް ކުރިމަތިވި ބޯކޮށް ވާރޭވެހުމުގެ ސަބަބުން ހިނގި ފެންބޮޑުވުމާއި ބިންގަނޑު ކަނޑައިގެން ދިއުމުގެ ނުރައްކާތެރި ކާރިސާއާ ގުޅިގެން، އެ ގައުމަށް ބޭނުންވާ ކޮންމެ އެހީތެރިކަމެއް ފޯރުކޮށްދިނުމުގައި އިންޑިއާއިން "ފަސްޓް ރެސްޕޮންޑަރ" ނުވަތަ އެންމެ ފުރަތަމަ އެހީއަށް އިސްނަގާ ގައުމުގެ ގޮތުގައި ދެމިއޮންނާނެކަމުގެ ޔަގީންކަން އިންޑިއާގެ ބޮޑުވަޒީރު ނަރެންދުރަ މޯދީ ދެއްވައިފިއެވެ.

ބޮޑުވަޒީރު މޯދީ ހާމަކުރެއްވި ގޮތުގައި، ނޭޕާލަށް ކުރިމަތިވި މި ކާރިސާގައި އާންމުންގެ ފުރާނަ ގެއްލި، އުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބުމަކީ އަސަރުން ފުރިގެންވާ ދެރަ ހާދިސާއެކެވެ.

މި އުނދަގޫ ދަނޑިވަޅުގައި އިންޑިއާ އޮތީ ނޭޕާލުގެ ސަރުކާރާއި ރައްޔިތުންނާއެކު ކަމަށާއި، އެކުވެރި އަވަށްޓެރި ގައުމެއްގެ ހައިސިއްޔަތުން ބޭނުންވާ ކޮންމެ އެހީއެއް ފޯރުކޮށްދިނުމަށް އިންޑިއާއިން އަބަދުވެސް ތައްޔާރަށް އޮތް ކަމަށް މޯދީ ވިދާޅުވިއެވެ.

މި ކާރިސާގައި މިހާތަނަށް މަދުވެގެން 47 މީހުން މަރުވެފައިވާ ކަމަށް ފުރަތަމަ ރިޕޯޓްތަކުން ދައްކާއިރު، ގިނަ ސަރަހައްދުތަކެއްގެ މަގުތަކާއި ފާލަންތައް ފަދަ މުހިންމު އުމްރާނީ ވަސީލަތްތައް ވަނީ ފެނުގެ އަސަރުކޮށް ދޮވެވިގެން ގޮސްފައެވެ.

ނޭޕާލުގެ މޫސުމާ ބެހޭ އިދާރާއިން ވަނީ ކޯސީ، ތާމޯރު، އަރުން އަދި ސުންކޯސީ ފަދަ ކޯރުތަކުގެ ފެންގަނޑު ނުރައްކާތެރި މިންވަރަކަށް އުފުލެމުންދާތީ، އިލާމް، ޖާޕާ އަދި މޮރަންގް ފަދަ ގިނަ ސަރަހައްދުތަކަކަށް ކުއްލި ފެންބޮޑުވުމުގެ އިންޒާރު ނެރެފައެވެ.

އަދި ކޯސީ ކޯރުގެ ފެންގަނޑު ބޮޑުވުމުގެ ސަބަބުން އިންޑިއާގެ އުތުރު ބިހާރު ސަރަހައްދަށްވެސް ފެންބޮޑުވުމުގެ ނުރައްކާ ވަނީ ބޮޑުވެފައެވެ.