ތިލަފުށީގައި އަލަށް ތަރައްޤީކުރާ ބައިނަލްއަޤުވާމީ ބަނދަރުގެ މަޝްރޫޢު ހަވާލުކުރުމުގައި، ދިވެހި ސަރުކާރުން ވަކި ޤައުމެއްގެ ބައިވެރިޔަކަށް އިސްކަންދީފައިވާ ކަމަށް ބުނެ މީޑިއާތަކުގައި ފަތުރަމުންދާ ޚަބަރުތައް އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ދޮގުކޮށްފިއެވެ.

އެ ވުޒާރާއިން މިއަދު ނެރުނު ބަޔާނެއްގައި ބުނެފައިވަނީ، މީޑިއާގައި މިފަދަ ވާހަކަތަކެއް ދެކެވެމުންދާކަން އެ ވުޒާރާގެ ސަމާލުކަމަށް އައިސްފައިވާ ކަމަށެވެ. އަދި މި މަޝްރޫޢަކީ ދިވެހިރާއްޖޭގެ ޤާނޫނުތަކާއި ގަވާއިދުތަކާ އެއްގޮތްވާ ގޮތުގެ މަތިން، މިފަދަ ބޮޑެތި އުމްރާނީ މަޝްރޫޢުތައް ކުރިއަށް ގެންދިއުމަށް ސަރުކާރުގައި ކަނޑައެޅިފައިވާ އުސޫލުތަކުގެ ތެރެއިން ކުރިއަށްގެންދާ މަޝްރޫޢެއް ކަމަށް ބަޔާނުގައިވެއެވެ.

ހަމައެއާއެކު މި ނިންމުމަކީ ހަމައެކަނި ރާއްޖޭގެ ދިގު ރާސްތާގެ ތަރައްޤީގެ އިސްތިރާޖީ އަމާޒުތަކަށް ބަލައި ނިންމާފައިވާ ނިންމުމެއް ކަމަށާއި، މިއީ އެއްވެސް ބައިވެރި ޤައުމަކާމެދު އޮތް ގުޅުމަށް ބަދަލެއް އައުން ނުވަތަ ވަކި ގޮތަކަށް ދެކޭކަން ހާމަކޮށްދޭ ކަމެއް ނޫން ކަމަށްވެސް ބަޔާނުގައި ބުނެފައިވެއެވެ.

މީގެއިތުރުން، މި ބަނދަރު ތަރައްޤީ ކުރުމާއި، މިލްކުވެރިކަމާއި، އަދި ހިންގުމުގެ ފުރިހަމަ ބާރު އަބަދުވެސް އޮންނާނީ ދިވެހި ސަރުކާރުގެ ދަށުގައިކަން އެ މިނިސްޓްރީން ވަނީ ހާމަކޮށްފައެވެ. ހަމައެހެންމެ ދިވެހިރާއްޖޭގެ އިސްތިޤްލާލަށް އެއްވެސް އުނިކަމެއް ނާންނާނެކަން ފާހަގަކޮށް، މިނިސްޓްރީން ބުނީ ރާއްޖޭގެ އުމްރާނީ ތަރައްޤީގެ ނިންމުންތަކުގައި، ޤާނޫނާއި ޤައުމީ މަސްލަހަތު ހުއްދަކުރާ މިންވަރަށްވުރެ އިތުރަށް ބަސްބުނުމުގެ ބާރު ކުރީގެ ނުވަތަ މިހާރުގެ ވެސް އެއްވެސް ބައިވެރިއަކަށް ލިބިގެން ނުވާނެ ކަމަށެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ބުނީ، ތިލަފުށީ ބަނދަރަކީ ދިވެހި ރައްޔިތުންގެ ޚިދުމަތަށާއި ޤައުމުގެ ދިގު ރާސްތާގެ ފާގަތިކަމަށްޓަކައި ބިނާކުރެވޭ ތަނެއް ކަމަށާއި، މި މަޝްރޫޢު ހަވާލުކުރެވުނީ ސަރުކާރުގެ ކަނޑައެޅިފައިވާ އުސޫލުތަކުގެ ތެރެއިން ކަމަށެވެ. އަދި މިއީ އަޅުގަނޑުމެންގެ އެއްވެސް ބައިވެރިއަކާމެދު ދެކޭގޮތް ހާމަކުރުމުގެ ގޮތުން ނިންމާފައިވާ ނިންމުމެއް ނޫން ކަމަށާއި، ރާއްޖޭގެ ހުރިހާ ބައިވެރިންނަކީވެސް އަބަދުވެސް އަގުވަޒަންކުރާ ފަރާތްތަކެއް ކަަމަށް ބުނެފައިވެއެވެ.

އިޤްތިޞާދީ ވުޒާރާއިން މިހެން ބުނެފައިވާއިރު، މި ސަރުކާރުގެ "މޯލްޑިވްސް ފަސްޓް" ޚާރިޖީ ސިޔާސަތުގެ މައިގަނޑު އަސާސަކީ، ރާއްޖޭގެ މިނިވަންކަމާއި ޤައުމީ މަސްލަހަތު އެންމެ އިސްކޮށް، ބައިނަލްއަޤުވާމީ ހުރިހާ ބައިވެރިންނާއެކުވެސް ހަމަހަމަ އަދި ބިނާކުރުވަނިވި ގުޅުމެއް ދެމެހެއްޓުން ކަމަށް ސަރުކާރުން އަބަދުވެސް ގެންދަނީ ބުނަމުންނެވެ.