ބ. ތުޅާދޫގައި ސަރުކާރުން ތަރައްޤީކުރަމުން އަންނަ ޒަމާނީ ފެންވަރުގެ އައު ހޮސްޕިޓަލުގެ ޢަމަލީ މަސައްކަތްތައް ބާރު ސްޕީޑެއްގައި ކުރިއަށްދާ ކަމަށް، މި މަޝްރޫޢުގެ ކޮންޓްރެކްޓަރު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

އެމްޓީސީސީން ހާމަކޮށްފައިވާ އެންމެ ފަހުގެ މަޢުލޫމާތުތަކަށް ބަލާއިރު، ދެ ފަންގިފިލާއަށް ޢިމާރާތްކުރާ މި ހޮސްޕިޓަލުގެ ގްރައުންޑް ފްލޯގެ ސްލެބް އެޅުމުގެ އެންމެހައި މަސައްކަތްތައް މިހާރު ވަނީ އެއްކޮށް ނިންމާލެވިފައެވެ. އަދި މިހާރު ސައިޓުގައި ކުރިއަށްދަނީ އިމާރާތުގެ ފުރަތަމަ ފަންގިފިލާގެ ބޭރު ފާރުތަކުގައި ސިމެންތި ޖެހުމުގެ މަސައްކަތެވެ. މީގެއިތުރުން، މި މަޝްރޫޢުގެ ދަށުން އެރަށުގައި ޤާއިމުކުރާ އެކޮމޮޑޭޝަން ބްލޮކްގެ ރޭނުމުގެ މަސައްކަތްތަކުގެ 90 އިންސައްތަ މިހާރު ވަނީ ފުރިހަމަކުރެވިފައެވެ.

މިނިސްޓްރީ އޮފް ހެލްތުގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢަކީ ގާތްގަނޑަކަށް 114.5 މިލިއަނާއި 124 މިލިއަން ދިވެހި ރުފިޔާއާ ދެމެދުގެ ބަޖެޓަކުން ހިންގާ ބޮޑު މަޝްރޫޢެކެވެ. މި މަސައްކަތް ރަސްމީކޮށް ފަށާފައިވަނީ 2023 ވަނަ އަހަރުގެ ޖުލައި މަހުގެ ތެރޭގައެވެ.

އާބާދީގައި 3,100 އަށްވުރެ ގިނަ މީހުން ދިރިއުޅެމުން އަންނަ ތުޅާދޫގައި ޤާއިމުކުރާ މި އައު ހޮސްޕިޓަލަކީ 30 އެނދުގެ ޖާގައިގެ އެކުލެވޭ ތަނެކެވެ. މި މަޝްރޫޢުގެ ދަށުން ބަލިމީހުންނަށް ފަރުވާދޭ މައި ހޮސްޕިޓަލް އިމާރާތުގެ އިތުރުން، ޚިދުމަތްތަކަށް ބޭނުންވާ ސަރވިސް ބްލޮކަކާއި، ޑޮކްޓަރުންނާއި އެހެނިހެން މެޑިކަލް މުވައްޒަފުން ތިބުމަށް ޚާއްޞަ އެކޮމޮޑޭޝަން ބްލޮކެއް ވެސް ތަރައްޤީކުރެވިގެންދާނެއެވެ.

މި މަޝްރޫޢު ނިމި، އައު ހޮސްޕިޓަލުން ޚިދުމަތް ދޭން ފެށުމުން، މިހާރު ތުޅާދޫ ޞިއްޙީ މަރުކަޒަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ލިބި، ރަށުގެ ރައްޔިތުންނަށާއި ކައިރި ރަށްރަށުގެ މީހުންނަށް ފެންވަރު ރަނގަޅު ޞިއްޙީ ޚިދުމަތްތައް ފަސޭހަކަމާއެކު ލިބިގެންދާނެއެވެ.