މަސްތުގެ ހާލަތުގައި ތިބެ މަގުމަތީގައި ވެހިކަލް ދުއްވާ މައްސަލަތައް އާދާޔާ ހިލާފަށް އިތުރުވެފައިވާތީ، އެކަމަށް ޚާއްޞަ ސަމާލުކަމެއް ދީގެން ފުލުހުން މަސައްކަތް ކުރަމުންދާ ކަމަށް ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.

މިނިސްޓަރު މިހެން ވިދާޅުވީ އާންމުންގެ ސުވާލުތަކަށް ޖަވާބުދެއްވުމަށް ބޭއްވި "އަހާ" ފޯރަމްގައި މައުލޫމާތު ދެއްވަމުންނެވެ.

ފޯރަމްގައި ވާހަކަފުޅު ދައްކަވަމުން އިޙްސާން ފާހަގަކުރެއްވި ގޮތުގައި، މަގުމަތި ބެލެހެއްޓުމަށް ފުލުހުން އުޅޭ މިންވަރު އިތުރުކޮށްފައިވީ ނަމަވެސް، މަގުމަތީގައި ހިތާމަވެރި ހާދިސާތައް ހިނގުން އަދިވެސް މަދެއް ނުވެއެވެ.

މިއީ ހަމައެކަނި ލައިސަންސް ނެތި ދުއްވުމުގެ މައްސަލައެއް ނޫން ކަމަށާއި، ލައިސަންސް އޮންނަ ބައެއް މީހުންނަށްވެސް މަގުމަތީގެ އެންމެ އާދައިގެ ގަވާއިދުތައް ނޭނގޭކަން ހިނގާފައިވާ އެކްސިޑެންޓްތަކުން ސާފުވާ ކަމަށް އޭނާ ވިދާޅުވިއެވެ.

އަދި ނުރައްކާތެރިކޮށް ދުއްވި 1,904 ވެހިކަލެއް ފާއިތުވި ދެ އަހަރު ތެރޭގައި ޓޯކޮށް، ބޮޑެތި އަދަދުތަކުން ޖޫރިމަނާކުރުމުގެ އިތުރުން ބައެއް މީހުންނަށް ޖިނާއީ ދައުވާ އުފުލާފައިވާނެ ކަމަށްވެސް މިނިސްޓަރު ފާހަގަކުރެއްވިއެވެ.

މާލޭގެ މަގުތަކުގައި ނުރައްކާތެރިކޮށް ވެހިކަލް ދުއްވާ މައްސަލައިގައި އެކަށީގެންވާ ފިޔަވަޅު ނޭޅޭ ކަމަށް ބުނެ އާންމުންގެ ބޮޑެތި ފާޑުކިޔުންތަކެއް ފުލުހުންނަށް ދަނީ އަމާޒުވަމުންނެވެ.

މީގެތެރެއިން ސޯސަންމަގުގައި ހިނގި ނުރައްކާތެރި އެކްސިޑެންޓެއްގައި އަނިޔާވި އަންހެނަކު މަރުވި ހާދިސާއާ ގުޅިގެން ކަންބޮޑުވުން އިތުރުވެފައިވާއިރު، އެ މައްސަލައިގައި ހައްޔަރުކުރި މީހާއަކީ ލައިސެންސް ނެތި ދުއްވައިގެން މީގެ ކުރިންވެސް އެކި ފަހަރު މަތިން ޖޫރިމަނާކޮށްފައިވާ މީހެކެވެ.

މީގެއިތުރުން، ޓްރެފިކް ބާރުބޮޑު ގަޑިއެއްގައި ނުރައްކާތެރިކޮށް ސައިކަލް ދުއްވި ބައެއްގެ ވީޑިއޯއެއް ސޯޝަލް މީޑިއާގައި އާންމުވުމާ ގުޅިގެން، އެ މީހުން ހޯދުމުގެ މަސައްކަތްވެސް ފުލުހުން ދަނީ ކުރަމުންނެވެ.